Na Website Oqo

E inaki ni website oqo, me kaburaka na itukutuku ni kaukauwa vuni ni dra i Jisu, kei na kena cakacaka mana tiko e na nodra bula e udolu vakaudolu na tamata e veiyasa ivuravura.

Na ilesilesi ni kena vakatetei na itukutuku talei oqo e sa noda ilesilesi taucoko na tamata vakabauta, ka sa inaki bibi duadua ni noda bula me da cakava na veika kece eda rawa ni cakava, me yaco kina na inaki ni Kalou oqo. E kaya o Jisu, ni na vunautaki mada na iTukutuku oqo ni Nona Matanitu e vuravura taucoko me ivakadinadina, e muri e na qai yaco na ivakataotioti.

E na Nona a lesia vei ratou na Nona ilawalawa ko Jisu na itavi oqo, ka talai ratou me ratou “lako yani ki vuravura taucoko, ka vunautaka na itukutuku vinaka kivei ira na tamata kecega,” e ratou a veilecayaki vakalevu e na nodratou rogoca. Me ratou na yacova vakacava na veiyasa ivuravura taucoko? Me ratou taubale beka se vodo kameli?

O ya ga na sala ni veilakoyaki ka tu vei ira e na gauna o ya, ka sa na bau bolei ratou dina na ivakaro o ya nei Jisu.  Ia, e na kaukauwa ka solia vei ratou na Yalo Tabu, e ratou mani rawata kina me vakavotukanataki na ilesilesi o ya.

Eda kalougata vakalevu o keda nikua, ni sa levu sara na veisala ni kena rawa ni vakayacori na itavi bibi oqo. Eda sa rawa ni vodo motoka, basi, sitima ni vanua, kei na waqavuka, me da kauta kina na itukutuku vinaka ki veiyasa ivuravura.

Ia, e na kena sa toroi cake talega na kila ka, na buli ni veiyaya me da vakayagataka e na veivosaki kei na volavola, kei na kena dolavi na veisala ni veitaratara, me vaka na computer kei na internet, sa rawa sara ga me da vakau itukutuku ki veiyasa ivuravura ni da dabe toka ga e loma ni noda veivale, ka vakayagataka na veisala vovou oqo.

Sa ka levu kina na vakavinavinaka, ni dolava vei keda na Kalou na katuba oqo,  me da vakayagataka me vakatetei kina na Nona vosa kei na Nona matanitu ki vuravura raraba, ka me da vakayacora kina na Nona veitalai e na noda bula. Eda sa rawa ni vakaivotavota kece e na cakacaka dokai oqo ni noda Turaga, e na noda veisoliyaka na website oqo vei ira na wekada kei ira na noda itokani.

Me vakalougatataki kemuni na Tamada sa cecere sara!

I.Q. Varea

Malevani 2012

_______________________________________

Ni qai sikova talega na websites oqo:

Na iNaki Vuni E 5 Ni Nomu Bula

Eda A Buli Me Da Lewa

Gallery of Calvary

 

Be Sociable, Share!

Leave a Reply

Your email address will not be published. Required fields are marked *

IMPORTANT! To be able to proceed, you need to solve the following simple math (so we know that you are a human) :-)

What is 14 + 2 ?
Please leave these two fields as-is: