Wase 8 – NA VEIVINAKATI E NA VUKU NI DRA

“Sa tau Vua na cudruvi sa vu ni noda veivinakati tale” – Aisea 53:5

Na veivinakati, e sa dua tale na vua bibi ni kena taurivaki na dra i Jisu ki na noda bula:

“Ni sa vinakati me sinai ko Koya e na ka kecega; ka me vakaveivinakatitaki ira kaya na ka kecega e na Vukuna, ni sa ia mada na ka ni veivinakati e na Nona dra ni sa lauvako ki na kauveilatai; io, e na Vukuna ga, se ra tu e vuravura se ra tu mai lomalagi.

Oi kemudou talega, dou a kai tani e liu ka meca e na vu ni yalomudou e na cakacaka ca, sa qai vakaveivinakatitaki kemudou ko Koya, e na yagona vakalewe ni sa mate, me vakaraitaki kemudou kina ni dou sa yalosavasava ka sega ni beitaki rawa, ka sega ni vunauci rawa e Matana,” (Kolosa 1:19-22).

Ni a bulia na imatai ni tamata na Kalou, e a qai tauyavutaka e dua na veimaliwai veilomani ka veivakabauti kei Atama.  Oqo me se qai itekitekivu ni nodrau veitokani na tamata kei Koya na Dauveibuli.

E a bulia talega na yalewa na Kalou, ka tauyavutaka talega na veitokani veilomani oqo kei rau ruarua.

E a bulia talega na yalewa na Kalou, ka tauyavutaka talega na veitokani veilomani oqo kei rau ruarua.

Me tekivu mai na gauna o ya, na nodra bula kece na tamata vakabauta kilai levu e na iVola Tabu,  e sa dusia tiko ga mai e dua na ka bibi; o ya ni gadreva na Kalou levu oqo me veitokani voleka sara kei keda na tamata. Eda raica na dina oqo e na nodratou bula ko Eparama, Noa, Mosese, Pita, Paula kei na vuqa tale.

Ia e ka ni rarawa ni a qai mai cavuka na veimaliwai titobu oqo ni Kalou kei na tamata e a bulia, e na nodrau a mai vakanadakui Koya ko Atama kei Ivi, ka rau digitaka na bula veisaqasaqa kei Koya, ka sega na veitokani.  E a sa mai basika e dua na ilati se lalaga e na kedrau maliwa na Kalou kei ira na iblubuli ni Ligana. Na ilati se lalaga oqo, e a vakatakilakilataki tiko e na ilati ka tu e na vale-ni-soro, ka da a sa raica oti mai.

E na vuqa na noqu raivotu, e dau vakavotukanataki vakayago vei au na ilati oqo, na ilati ka basika mai e na vuku ni noda ivalavala ca, me wasei keda tani mai Vua na Kalou.  Na ilati oqo e vakatakilakilataka tiko na veimecaki kei na talaidredre ni tamata vua na Kalou.  E kaya vei keda na iVola Tabu, “Ni sa veimecaki na itovo vakayago kei na Kalou: ni sa sega ni vakarogoca na vunau ni Kalou, ia sa dredre sara me vakakina.

Ia ko ira sa itovo vakayago, era sa sega ni cakava rawa na ka e vinaka vua na Kalou,” (Roma 8:7-8).

Ia, na dra i Karisito e taukena na kaukauwa, e na vuku ni veivosoti, me kauti rau vata tale mai na Kalou kei na tamata, ka vakakina, na tamata kei na tamata.

VEIVINAKATI KEI NA KALOU

E kaya na Kolosa 1:20 ni ko Jisu, “sa ia mada na ka ni veivinakati e na Nona dra, ni sa lauvako ki na kauveilatai”. E taukena na dra i Jisu na kaukauwa e sa rui veivakurabuitaki, eda kunea rawa kina “na sala vou ka bula,” (Iperiu 10:20) ki na serau kei na veivinakati ni Kalou.

Na cava na ibalebale ki na noda bula na veivinakati oqo e na vuku ni dra?

E SA KAU LAIVI  NA NODA VEIMECAKI KEI NA KALOU

A imatai, e sa sega ni gadrevi me da veimecaki kei na Kalou.

Era veimecaki kei na Kalou na tamata, ka so era vakadidivarataki ira vei Koya e na vuku beka ni kena vakavureya cake mai na sasabai na nodra se sega ni vakatusa na nodra yalo beitaki, ka vakavuna kina me ra cata na Kalou.

Era rerevaka na itotogi, ka ra dro tani mai na Nona serau.  Ia, ko Karisito e sa sauma oti na isau ni keda itotogi, ka sa sega ni dua na vuna me da sabai keda kina mai Vua na Kalou.   E kaya na iVola Tabu ni da rawa ni curu vakadoudou ki na serau ni Kalou, ka kerea na veivuke e na gauna eda gadreva kina. (Raica na Iperiu 4:16.).

Era rerevaka na itotogi, ka ra dro tani mai na Nona serau.

E SA TAUYAVU VOU TALE NA NODA VEITOKANI VOLEKA KEI NA KALOU

Karua, e taukena na dra na kaukauwa me tauyavutaka vou tale na noda veimaliwai titobu vata kei na Kalou.  Eda sa rawa ni veitokani voleka sara kei Koya, me vaka ga e a nakita mai liu.

“Ia e na gauna oqo, ni dou sa tu vata kei Karisito, oi kemudou ka yawa e liu, dou sa qai voleka mai e na vuku ni dra i Karisito,” (Efeso 2:13).

E na vuku ni cakacaka mana ni vakacabo isoro nei Jisu, e sa noda rawa kina na tagane kei na yalewa eda sa wili me da luvena, na veivinakati kei na kena tauyavu vou tale ni noda veitokani kei Koya na Tamada vakalomalagi.

E na gauna eda sa vakasavasavataki kina e na dra mai na kauveilatai, e dodoka sobu mai vei keda na Ligana na Kalou, ka dreti keda yani vakavoleka Vua. Ko sa lomani vakalevu mai Vua!  E a vinakati iko mo okati mo luvena mai na gauna ko a se buketetaki voli kina e kete itinamu. Oqo dina na inaki ni kauveilatai – me da veivinakati tale kina kei na Tamada vakalomalagi.

“Eda sa daureki talega e na Kalou e na vuku ni noda Turaga ko Jisu Karisito, o koya eda sa yaco kina me da veivinakati tu,” (Roma 5:11).

E dina beka ni ra na biligi iko tani na wekamu, nomu itokani kei ira tale e so, ia ko na sega ni biligi tani mai vua na Tamamu vakalomalagi, oqo se mai muri, baleta ni ko sa luvena.  E sega walega ni sa kacivaka oti ko Karisito na noda Bete Levu, ni ko sa savai ka sa vosoti oti, ka sega walega ni sa kaya oti na Turaga-ni-Lewa kei lomalagi kei vuravura, ni ko sa vakadonui oti, ia e sa kaya talega ni ko sa Nona itokani. (Wilika na Joni 15:15).

Na Kalou e na nomu itokani, mo drau dau sala vata ka veitalanoa, ka na tiko kei iko e na veigauna dredre kece ko sota kaya. Ni ko sa tekivu kila vinaka na titobu ni loloma ni Kalou vei iko,  ko sa na vakatubura e dua na veitokani kamikamica e na nomudrau veimaliwai.

Vakananuma mada, eda sa rawa ni veitokani voleka dina sara, me vaka beka e rua na veitau dredre, kei Koya na Kalou levu oqo!

NA VAKACEGU KA SOLIA NA KALOU, E NA TAQOMAKA NA YALODA KEI NA NODA VAKASAMA

Katolu, e na vuku ni dra i Jisu, eda vakila e dua na vakacegu ka vukei keda me da yalodei ka da toso tiko ga ki liu e na veigauna dredre.  E a kaya ko Jisu vei ratou na Nona tisaipeli ni bera ni la’ki vakoti,

Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou me vaka sa solia ko vuravura.  Me kakua ni rarawa na yalomudou, se rere,” (Joni 14:27).

Na apositolo ko Paula, e a vakayaloqaqataki ira na tamata vakabauta  ena vakasama oqo:

“Dou kakua sara ni lomaocaoca; ia e na ka kecega me vakatakilai vua na Kalou, na nomudou kerekere e na masu kei na dau cikecike kei na vakavinavinaka.

“Me kakua ni rarawa na yalomudou, se rere,” (Joni 14:27).

Ia na vakacegu ni Kalou, sa uasivia na ka kecega e kilai rawa, e na vakataudeitaka na yalomudou e na vuku i Karisito Jisu.” (Filipai 4:6-7).

 

NA IVAKAYAKAVI NI TURAGA E IVAKARAITAKI NI NODA VEIVINAKATI KEI NA KALOU

Na noda veivinakati kei na Kalou e vakaraitaki e na veigauna eda vakaivotavota kina e na iVakayakavi ni Turaga, ka da rawa ni vakayagataka na veigauna oqo me da vakatitobutaka kina na noda veitokani kei Koya.  Oqo e baleta ni sa tiki bibi ni noda bula veimaliwai kei na Kalou na tamata lotu vaKarisito, na noda veiwaseitaka na iVakayakavi ni Turaga.

Na noda vakaivotavota e na sakaramede oqo, e na dau kauta lesu mai ki na noda vakasama yadudua, na isau vakaitamera ka a saumi me da vueti kina.  Oqo e cakacaka talega ni noda talairawarawa kei na noda vakadinadina.

Ni a tauyavutaka ko Jisu na iVakayakavi ni Turaga, e a solia talega na ivakaro matata me baleta na kena caka:

“A sa taura na madrai, ka vakavinavinaka, ka dovia, ka solia vei ira, ka kaya, Oqo na yagoqu sa soli e na vukumudou, dou cakava oqo mo dou vakananumi au kina.

Sa vaka talega kina na bilo, ni sa oti na ivakayakavi, ka vaka, A bilo oqo na veiyalayalati vou e na noqu dra sa liviraki e na vukumudou.” (Luke 22:19-20)

E dua na tamata lotu, e a vakatoka na iVakayakavi ni Turaga me dua na ivakayakavi ka na ia tikotiko ga.  E veigauna kece eda vakaivotavota kina, e kau lesu mai ki na noda vakasama ni oqo, e se dua tale na ikanakana ka a tekivu e na rumu e cake, ni a dovi madrai vata kei ratou na Nona tisaipeli ko Jisu. Me vakatekivu mai na gauna o ya, e sa dau vakayacori tu ga mai, ka vavaca mai na veidrau na yabaki, me da kua ni guilecava kina ni a mate o Koya e na vukuda.

Na ivakarau oqo, e a lesi ki na isoqosoqo lotu, me rawa ni da dau nanuma tiko ga kina, ka kua ni guilecava, na dra i Jisu ka a dave mai Kalivari. Na kena dovi na madrai kei na gunuvi ni waini, e na vakavouya tiko ga e na noda vakasama na bibi ni Yagona kei na Nona dra.

Ia na ivakayakavi ni veitokani oqo, e rai tale tiko ga ki liu.  E vakananumi tiko kina na mate nei Jisu “ka yacova na Nona lako mai” (1 Korinica 11:26).  Ena dua na sala e veivakurabuitaki, e nanamaki tiko ki na kana vata ni vakamau ni Lami ni Kalou e na bula tawa mudu.  E soqoni keda vata mai vakayalo kei ira kece na tamata vakabauta ka ra a bula e liu, ko ira era bula tu oqo, kei ira era na muri mai.

Na kena dovi na madrai kei na gunuvi ni waini, e na vakavouya tiko ga e na noda vakasama na bibi ni Yagona kei na Nona dra.

Na madrai eda veidovitaka e na sakaramede oqo, e vakatakilakilataka tiko na waqawaqa  ni Madrai ni Bula. Na waqawaqa oqo, sa i Koya na Kalou, ko Jisu e na Nona taurivaka na waqawaqa vakatamata, ka bula maliwai keda na tamata, ka qai cabora na waqawaqa vakayago o ya e na vukuda.

Na bilo, se na waini, e vakaibalebale tiko ki na dave ni dra i Jisu, me sala e tauyavutaka kina na Kalou e dua na veiyalayalati vou kei ira na Nona tamata.

E na veika e vakatakila vei au na Kalou e na vuku ni dra, au sa kila kina ni noda veiwaseitaka tikoga na madrai kei na bilo, e vakavuna na kena vakavoui tikoga kina e lomada kei na noda vakasama na veivakabulai ka cakava ko Jisu mai Kalivari.  E sega ni dua tale na yago se na dra me na cakava rawa na veivakabulai oqo.

E na veigauna kece eda vakaivotavota kina e na wasei ni madrai kei na bilo waini, eda sa kaya tiko vua na Kalou, “E a dodonu me’u mate, ia au sa vakatusa na dina ni sa sosomitaki au ko Jisu!”

De lakolako me guilecavi na vakacabo isoro ka a cakava ko Jisu, ka da sa la’ki tiko wele e na vakacegu ni da sa vakabulai tu, ka sega ni nanuma na isau vakadomobula ka a saumi kina, sa dodonu kina me da dau kauta lesu mai ki na noda vakanananu na Yago i Jisu ka a warolaki, vakamavoataki ka vakoti e na vukuda.

Sa dodonu me da dau nanuma na mavoa yadua ka a caka ki Yagona, na kuita yadua ka a tau e dakuna, kei na veigauna yadua ka a vakoti ka cokai kina me rawa kina na noda veisaututaki kei na Kalou.  Na madrai e dusia tiko vei keda na rarawa kece e a tau ki Yagona – na rarawa ka dodonu me noda, ia e a ciqoma na Turaga e na vukuda.

E vakakina talega e na vuku ni bilo.  Ni da gunu mai na bilo, e dodonu me da dau nanuma na dra ka a vakadavea ko Jisu mai na vale vakatui nei Eroti, e na itikotiko ni kovana nei Pailato, ka vakakina e na delana mai Kalivari.

E na veigauna ko gunu kina mai na bilo e na iVakayakavi ni Turaga, mo dau nanuma na Nona dra. E a dave na Nona dra, me isosomi ni nomu dra.  E a sauma na Nona dra na isau ni veivosoti e na vukumu.  Ni ko sa vosoti, e gadrevi kina mo nanuma na Nona dra, ka mo ciqoma me sa isau duadua ga ka bokoci rawa kina na nomu ivalavala ca.

NA VEIVINAKATI KEI IRA NODA ICABA

Na iVakayakavi  ni Turaga, e vukea talega me da dau nanuma na noda veitokani kei na veivinakati kei ira na noda icaba e na vuku i Karisito.

A bilo ni vakavinavinaka keitou sa vatonaka, sa sega li ni ka sa noda vata kina na dra i Karisito? Ai buli madrai eda sa dovia, sa sega li ni ka sa noda vakakina na yago i Karisito?

Ni sa duabau ga na Madrai , sa qai yagona e duabau ga ko ikeda e lewe vuqa, ni sa noda na ivotavota ni madrai ko ya e duabau ga.

Dou raici ira na Isireli vakayago, ko ira era sa kania na veimadrali, sa sega li ni nodra na ivotavota kei na icabocabo-ni-soro? (1 Korinica 10:16-18).

Na yavu ni noda veivinakati kei ira na noda icaba, sa ikoya na noda sa veisaututaki kei na Kalou e na vuku ni dra mai na kauveilatai. Na noda veivinakati oqo kei na Kalou, e sa semati keda kina Vua e na veitokani voleka, ka solia vei keda na bula vakacegu, o koya sa dua na vua ni Nona Yalo Tabu.

Me vaka ni sa Tamada na Kalou, eda sa lewe taucoko ni dua na matavuvale na tamata vakabauta kece,.  Me vaka ni a buli talega na tamata e na iyaloyalo vaKalou, sa dodonu kina me da dokai ira na tamata kecega.

Ia na vunau oqo eda sa rawata mai vei Koya, me lomana talega na wekana ko koya sa lomana na Kalou,” (1 Joni 4:21)

Ke da raica lesu mada na nona a labati Epeli ko tuakana, e a vu ni laba oqo ni a sega ni via ciqoma ko Keni na nona itavi me lomana ka karona na tacina.

“Koi au beka na ivakatawa i taciqu?” (Vakatekivu 4:9).

Oqori na isau ni taro ka a sauma kina ko Keni na taro ni Kalou, se sa evei ko Epeli na tacina.

Ia, raica na kena duidui oqo, e na Nona lako mai ki vuravura vakaTuakada ko Karisito, ka mai cabora na Nona bula e na vukuda, me vakaraitaka vei keda na itovo ni loloma me da taurivaka vei ira na tamata.  E vola vakaoqo ko Joni,

“Ia kevaka eda sa ia na ivalavala ni rarama, me vaka sa tu e na rarama ko Koya, eda sa qai duiveiwekani vata, a sa vakasavasavataki keda mai na ca kecega na dra i Jisu Karisito na Luvena.” (1 Joni 1:7).

Ni da sa bula tiko e na rarama, kei na dina ni noda sa vakabulai, eda sa rawa ni veitokani kei ira era bula wavoliti keda.  Ia, ni da cakava oqori, na dra i Jisu e na savai keda mai na noda ivalavala ca kecega.

E sega walega ni cakacaka yaco na kaukauwa ni dra oqo e na noda dui bula vakaveitokani, ia e dodo talega yani ki na veimaliwai vakamatatamata, ka vakamatanitu.  E taukena na dra i Jisu na kaukauwa me veisaututaki kina na veimatatamata, duitovotovo, kei na duivosavosa.  E veisautaki ira kina me ra dua na matatamata vou – na matatamata ni veiyalayalati ni Kalou.

E dua na ka, ka na vu ni qoroqoro levu duadua mai lomalagi, o ya na umatamata levu, ka ra na lewena na veimata tamata mai veiyasa ivuravura taucoko, era na mai soqoni e mata ni dabedabe vakatui ni Kalou:

“Sa oti oqo ka’u sa vakaraica, ka raica, sa dua na isoqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu,  kei na duivosavosa, era sa tu e na mata ni tikotiko vakaturaga, kei na mata ni Lami,

Era vakaisulu e na isulu vulavula, ka taura na iviu e na ligadra. A ra sa kaci e na domo levu ka kaya,  A vu ni bula na noda Kalou, o Koya sa tiko e na itikotiko vakaturaga, Vua na Lami talega!” (Vakatakila 7:9).

O ira – e na vuravura oqo – ka ra a bulataka tu e dua na bula ni veimecaki kei na veivakamatematei, ni bera nodra qai veisaututaki kei ira nodra meca e na vuku i Karisito, era vakaraitaka tiko na dina oqo:  “A sa buli ira, era sa dra vata, na lewe ni veivanua kecega, me ra tiko e delai vuravura taucoko,” (Cakacaka 17:26).

Oqo e sega ni dina vakayago walega, ia e dina vakayalo talega, ka ni sa vakamatabokotaki keda tu mai kina e na veitabayabaki sa sivi, na  vuni ca ni vuravura oqo.  Ia, na dina ni bula veimaliwai sautu vakamatatamata duidui, e sa mai vakadeitaki ka vakavoui vou tale, e na vuku ni kaukauwa ni dra ni Lami.

Na veimecaki kei na veivaluvaluti, e sa ka tudei ni noda bula vakamatatamata duidui, mai na ivakatekivu kei vuravura.

E rawarawa me yaco na bula veitawasei kei na bula veimecaki e na kedra maliwa na veimatatamata, ia na dra talei duadua ga ni Lami ni Kalou, e taukena na kaukauwa me cakava na veisaututaki tudei, ka kauti keda vata tale mai.  E a volavola ko Paula me baleta na nodra veimecaki makawa na Jiu kei ira na veimatanitu tani, e na nona a kaya,

“Ni sa ikoya na vu ni noda veivinakati tale, o Koya sa qisia na rua me duabau, a sa basuka na bai sa ia kina na tawasei, ni sa vakaotia e na Yagona na ka eda a veicati kina, o koya na vunau sa vakarota na ivalavala ni lotu: me ia kina na veivinakati, ka qisi rau me rau tamata vou ni rau tu vata kaya” (Efeso 2:14-16).

E sa inaki tu ni kosipeli mai na kena itekivu, me vakaduavatataki ira na veimatatamata kei na duivosavosa kece e mata ni Kalou, ka sa ikoya na dra i Jisu, e kauti keda vata mai.  E sega ni vakaiwiliwili rawa na levu ni turaga kei na marama vakabauta e veiyasa ivuravura raraba, era dau soqoni vata me ra vakaivotavota e na iVakayakavi ni Turaga, ka ra dau vakananuma kina na dra i Karisito, ka da sa duavata talega kei ira.

E vuqa na tamata, era sa tovolea e na veisala voravora, ka taurivaki kina na iyaragi duidui, me ra vakaduavatataki ira na duikaikai e na ruku ni dua ga na matanitu, ia e sega ni dua vei ira me rawata.  Ia, na matanitu nei Karisito, e sa rua na udolu na yabaki na kena bula tu mai, e na vuku duadua ga ni kaukauwa ni Nona dra.

E sa veisautaki ira na veimatatamata na Nona dra.  Ko ira na vulagi saravanua, era sa rawa ni lako vakagade e daidai ki na veivanua tawa lotu e liu, ka dau yaco kina na veikanikani kei na lotu vakaluve-ni-wai, ka ra raica na bula veisaututaki era sa bulataka na kena itaukei nikua. E rawa ga oqo e na vuku ni cakacaka ni kosipeli e na nodra bula na itaukei ni veivanu a oqori.

E volaitukutukutaki tu na italanoa ni kena a voca e dua na waqa e na Pasifika e na rua na drau vakacaca na yabaki sa oti, ka ra qai qalo ki vanua na kena kaimua, me ra qara bula kina.  E sa kilai raraba tu na kedra italanoa, ni ra mani la’ki tawana na yanuyanu lala o ya, ka ra sa bula ka vakatubu kawa tu mai kina e na veitabayabaki sa sivi me yacova mai nikua.

E na gauna era a qai kune kina, e qai laurai ni ra a vakatulewataka me ra vakamuria na ivakavuvuli ni Veiyalayalati Vou, na ivola era a vueta mai na nodra waqa e na gauna e a voca kina.  E a qai laurai na veika e basika e na nodra vakamuria na ivakavuvuli oqo: na kena tauyavutaki e dua na itikotiko sautu ka ra veilomani na lewena, ka cicivaki vakavinaka kece ni veitiki ni nodra bula vata vakaumatamata.

E na gauna era a qai kune kina, e qai laurai ni ra a vakatulewataka me ra vakamuria na ivakavuvuli ni Veiyalayalati Vou.

Ko lomalagi e na qai tukuna talega na italanoa me baleti ira e vuqa na veimataqali kei na veimatanitu, ka ra a veisautaki mai na kaukauwa ka tu e na dra.

NA VAKACEGU KA KUNE E NA VEIVOSOTI

E dua tale na iwase ni noda veivinakati e na vuku ni dra i Karisito, sa ikoya na noda vakatubura na veivosoti e na noda bula – na veivosoti ni Kalou vei keda, kei na veivosoti eda solia ka da ciqoma mai vei ira na tamata.

E a vakadavea na Nona dra ko Karisito, me rawa ni vosoti keda kina na Kalou e na vuku ni ivalavala ca kece eda sa cakava oti, ka vakakina na Nona vosoti keda kevaka eda caka cala e daidai.  E sega walega ni a savai keda e na gauna eda a sucu vou kina, ia e sa vakarautaka tale tu ga na veivosoti me baleta na noda na lutu wasoma, e na noda bula ni veisiga.

“Ia kevaka eda sa ia na ivalavala ni rarama, me vaka sa tu e na rarama ko Koya, eda sa qai duiveiwekani vata, a sa vakasavasavataki keda mai na ca kecega na dra i Jisu Karisito na Luvena,” (1 Joni 1:7).

E sa sega na ivalavala ca, na caka cala, se na basu lawa, me na sega ni rawa ni kauta tani na dra i Jisu.  Na dina oqo e sa rawa ni vakayaloqaqataki keda, e na veigauna eda dau lomaleqataka kina na noda ivalavala ca, ka da vakasaqara me da savai vou tale mai Vua na Kalou.

Na dra i Jisu e solia talega vei keda na kaukauwa me da vosoti ira na tani, e na noda tubu tiko me da ucuya vakalevu cake na yaloyalo i Karisito.  E na Nona sa rube tu e na kauveilatai ko Jisu, e a qai masulaki ira na tamata ka ra vakoti Koya:

“I Tamaqu, kakua ni cudruvi ira, ni ra sa sega ni kila na ka era sa kitaka” (Luke 23:34).

Na kaukauwa ni veivosoti kei na bula veisaututaki, e sa tu e na dra ni Lami.  E kaya na iVola Tabu,

“Kevaka sa rawa, mo dou vakatovolea mo dou veilomani kei ira na tamata kecega” (Roma 12:18).

NA KOSIPELI NI VEIVINAKATI – A KOSIPELI NI VEIVAKADUAVATATAKI

Na kena itinitini, e solia vei keda na dra i Karisito e dua na ilesilesi ni veivakaduavatataki.  E na noda sa vosoti ka sema lesu tale vua na Kalou, eda sa vakaroti me da vakasaqaqara ka kauti ira mai na tani vei Koya, me ra kunea talega na veisavai kei na veivinakati kei Koya.

“A sa vu mai vua na Kalou na ka kecega, o Koya sa vakaveivinakatitaki keda kei Koya e na vuku i Karisito, ka sa sega ni wiliki vei ira na nodra ivalavala ca, ka sa solia vei keitou na itukutuku ni veivinakati” (2 Korinica 5:18).

Back To Table Of Contents

 

 

 

 

 

 

Posted in Uncategorized | Leave a comment

Wase 9 – NA VEISAU KA YACO E NA VUKU NI DRA

“Ia koi keda kecega, ni sa sega ni tabonaki tiko na matada, eda sa raica na iserau ni Turaga me vaka e na i iloilo, ka sa vakamataliataki me da vakataki Koya, ni sa tubu cake tiko na serau me uasivi, me vaka e na Turaga, o Koya na Yalo Tabu,” – (2 Korinica 3:18)

A ikatolu ni wase ni kena taurivaki na dra nei Jisu ki na noda bula, o ya ni solia na sala me da veisau kina vakayalo, me da ucuya na yaloyalo i Karisito. Me vaka e kaya na iVola Tabu,

“Ni sa vakacabora vakadua na isoro, sa cakava kina ko Koya na ka kecega e yaga vei ira era sa vakasavasavataki tiko,” (Iperiu 10:14, emphasis added).

E dina ni da sa vakabulai, ia eda sa “vakamataliataki … ni sa tubu cake tiko na serau me uasivi, me vaka e na Turaga” (2 Korinica 3:18).

Me kua ni da sa cegu e na noda ciqoma na yaga ni matai ni noda sotava na dra i Karisito, ia me da sa rokataka na bula veisau, o koya na isausau ni noda vakabulai.  Na sucu vou e sa itekitekivu walega.

NA KAUKAUWA NI BULA QAQA

E a dave na dra i Jisu me bokoci kina na nomu ivalavala kecega.  Ia, sa ikoya talega o ya na ka e solia vei iko na kaukauwa mo bula qaqa kina mai na dredre kei na veitemaki.  Ni sa tekivu yaco vei keda na veika dredre, e levu vei keda eda na vakalomalomani keda, ka da bilitaki keda tale vakai keda, ka kaya na veika me vaka “Na cava e dau yaco tu ga kina vei au na ka oqo?” se “ Na cava na vuna e dau cala  tu ga kina na veika au cakava?”

E so na gauna, eda dau vakila oqo baleta o koya na “dauibeitaki ira na wekada” e vakasagai keda tiko. (Wilika na Vakatakila 12:10).  E dau vakasolokakana ki lomada ka kaya, “Kevaka ko a tamata lotu dina, ke ko a sega ni cakava na ka o ya.”

E dau vakasolokakana ki lomada ka kaya, “Kevaka ko a tamata lotu dina, ke ko a sega ni cakava na ka o ya.”

Ni yaco vei iko oqori, e dodonu mo reki baleta ni sa yalataki oti ni na soli vei iko na kaukauwa mo vosota rawa kina.  E rawa ni vakadrukai na dauveibeitaki baleta na dra i Jisu e na vukei iko mo qaqa.  E na lako mai ko Setani me kaya vei iko ni ko sa druka ka sa sega na betemu.  Ia, ko sa rawa ni taurivaka na veika sa solia vei iko na Kalou, mo taviraka laivi kina mai lomamu na veika e sega ni vaKalou, ka vakaisosomitaka e na veika vaKarisito.

“Ia ni da sa qai vakadonui e na vuku ni Nona dra, e na qai rawarawa cake me da vakabulai mai na cudru e na vukuna.  Ia, kevaka eda sa veivinakati kei na Kalou e na vuku ni nona mate na Luvena, ni da sa veimecaki, e na qai rawarawa cake, ni da sa veivinakati tu, me da vakabulai tiko e na vuku ni Nona bula.

A sa sega ni koya walega, ia eda sa dau reki talega e na Kalou e na vuku ni noda Turaga ko Jisu Karisito, o koya eda sa yaco kina me da veivinakati tu.” (Roma 5:9-11).

SAVAI E VEISIGA

E dua na ka e sa solia vei keda na Kalou, o ya me da rawa ni savai mai na noda ivalavala ca e veisiga, ka vakakina na noda ivakarau e so ka veisaqasaqa kei na Nona itovo kei na Nona vakasama.  E na vuku ni veitemaki e vuqa e na vuravura oqo, e dau rawarawa kina me da lako sese, ka da rawa ni ciri tani mai na noda sa soli bula oti vei Karisito.

O ya na vuna eda gadreva kina na savai e na Nona dra e veisiga. Sa dua na ka talei me da kila ni rawa ni savai keda tikoga na dra i Jisu mai na ivalavala ca kecega!

“Ia kevaka sa yaga na dra ni pulumokau kei na me, kei na dravusa ni pulumokau yalewa ni sa kureitaki vei ira na dukadukali, me savasava kina na yagodra: e na vakatanievei na dra nei Karisito, o Koya ka vakacabori Koya vua na Kalou, e na vuku ni Yalo Tabu tawa mudu, ia ka sega vua na ca, e na sega beka ni rawarawa sara me vui laivi kina na nomudou lewa-eloma mai na cakacaka sa ka ni mate, mo dou qarava na Kalou bula?” (Iperiu 9:13-14).

Na ka e veivakayalodeitaki ki vua na tamata vakabauta e na nona bula e veisiga, o ya na kena ia tikoga ka sega ni cegu, na veisavai ni dra e na nona bula.  E veisiga kece, kerei Jisu me savai iko vou tale e na Nona dra, mo rawa kina ni qarava tikoga na Kalou bula.

NA MASUMASU, VAKATUTUSA KEI NA VAKAROKOROKO E VEISIGA

Karua, me vaka ni sa sega ni gadrevi na cakacaka ni vakacabo isoro, eda se rawa ga ni vuli mai na dina vakayalo ni kena ivakavuvuli.  E na noda lako mai ki na serau ni Kalou e na vakatutusa, vakarokoroko kei na masumasu, e dodonu me da dau nanuma na dina vakayalo ka tiko mai e daku ni veilawa ka ra a vakamuria tu mai na Isireli.  Oqo e vica na kena vakaraitaki:

  1. Me da nanuma ni ra a vakacabo isoro kama na kai Iperiu e na veimataka kei na veiyakavi.  Na imadrali ka ra cabo oqo, e sega ni ka ga ni kere veivosoti, ia era caka talega me cabo taucoko kina na bula vua na Kalou.  Ni ko dau masu , mo cabora tiko na nomu bula e veigauna vua na Tamamu vakalomalagi kei na Nona inaki kece, ka mo dau reki e na nomu tiko e na Nona iserau.
  2. Mo nanuma, ni a inaki ni isoro ni yalayala se bubului lasu, o ya me vakatubura na veivinakati vei rau na tamata kei na Kalou, ka vakakina vei rau na tamata kei na tamata.  E a vakamacala ko Jisu e na tikina oqo, e na Nona a kaya,

“Kevaka ko sa kauta na nomu imadrali ki na icabocabo-ni-soro, a sa nanuma mai kina sa dua na ka sa beitaki tiko kina na wekamu;

“Biuta tu na nomu imadrali e na mata ni cabocabo-ni-soro, ka mo lako mo drau veivinakati mada e liu kei na wekamu, mo qai lako mai ka vakacabora na nomu imadrali,” (Maciu 5:23-24).

E na nomu dau masu, kevaka ko nanuma ni leqa tiko na nomudrau veimaliwai kei na dua na wekamu se itokani, mo vakasaqara na veivosoti ni Kalou, ka mo qai tovolea mo vakavinakataka na nomudrau veitokani.  Kevaka e na veivuke, mo sauma lesu vua na wekamu, na isau ni veika e vakayalia mai na nomudrau veilecalecavi.

  1. Na vakacabo isoro ni cala vakacalaka e mata ni Kalou, era a vakacabora o ira ka ra caka cala, ka ra sega tu ni kila ni cala na ka era a kitaka e na tiki ni gauna o ya.  O Tevita e a rairai vakananuma tu beka na cala vakaoqo e na nona a masu ka kaya,

Mo ni dikevi au, na Kalou, mo ni kila na lomaqu; Mo ni vakatovolei au, ka kila na nanuma ni lomaqu; ka raica se sa dua na itovo ca vei au, ka tuberi au e na sala ni bula tawa mudu,” (Same 139:23-24).

Eda sa rawa talega ni masutaka na masu vata o ya, ka da kila ni dra i Karisito e na sega ni mudu na kena vakasavasavataka tiko na ivalavala ca kecega.

“(O Jisu) vakai koya ga ka colata na noda ivalavala ca e na yagona e na kauveilatai, me da mate tu ki na ivalavala ca, ka ia na ivalavala dodonu e na noda bula,” (1 Pita 2:24).

NA BULA QAQA MAI NA IVALAVALA CA

KEI NA VEITEMAKI

Na mate nei Jisu, o koya ka sa sauma na dinau ni caka ca kece, e sa kauta laivi na veivakadukadukalitaki ni valavala ca, ka sa vakatawayagataka na kena kaukauwa.  E na Nona colata na itotogi ni ivalavala ca me yacova sara na mate, e sa vakadruka kina na kaukauwa ni valavala ca, e sa kovea tani mai vua na meca na nona itoki, ka sa vakatarai ira na tamata vakabauta me ra vakila na kaukauwa ni dua na bula e vaKalou.

Na vakararavi ki na Nona dra, e solia vei keda na bula vakayalo, me da rawa ni qaqa kina mai na ivalavala ca e na noda bula e veisiga.  Na Nona dra e kauta laivi na noda ivalavala ca mai na serau ni Kalou, ka vuya na noda lewa-eloma mai “na cakacaka sa ka ni mate” (Iperiu 9:14).

NODA VAKATABUYA NA NODA BULA VUA NA KALOU

Na Kalou e sa tuvana tu na inaki ni noda bula yadua e na vuravura oqo, ka gadreva me kauta tani na veika e rawa ni vakataotaka na noda vakayacora na inaki o ya.

E na Vunau Ni Soro wase e 8, e ratou a vakatabui ko Eroni kei ratou na luvena  e na nodratou itavi vakabete.  E na kena a vakacabori na sipi tagane, e a qai kureitaka ko Mosese na kena dra e na icabocabo-ni-soro, ka qai boroya talega e so na dra e na daligadratou imatau kei na qaloqalo lelevu ni ligadratou kei na yavadratou imatau.  Na inaki ni cakacaka oqo, o ya me vakatakilakilataka na kena sa vakatabui na nodratou bula taucoko ki na cakacaka ni Kalou.

E na Vunau Ni Soro wase e 8, e ratou a vakatabui ko Eroni kei ratou na luvena e na nodratou itavi vakabete.

Me da taurivaka mada na kena ibalebale oqo ki na noda vakatabuya na noda bula vakai keda ki Vua:

  • Na daliga e vakaibalebaletaki ki na veika eda rogoca.  Na veika kece eda rogoca –  na retio, TV, CD, DVD, na veivosaki – na veika kece ka curu ki na noda vakasama, e dodonu me tauvuloni e na dra talei ni Lami.
  • Na iqaqalo levu ni liga, e vakaibalebaletaki ki na itavi kei na mesamesa vakacakacaka eda taukena.  E vakaibalebaletaki ki na veika eda rawa ni cakava.  Na veika kece eda cakava, e dodonu me caka me vakalagilagi kina na Kalou, ka caka e na kaukauwa vaKarisito.
  • Na iqaqalo levu ni yava, e vakaibalebaletaki ki na veivanua eda lakova.  E vakaibalebaletaki ki na noda inaki kei na veika eda navuca e na noda ilakolako vata kei na Turaga e na veisiga.  E veivanua kece eda lakova, e dodonu me da vakaraitaka tiko na itovo kei na inaki ni Kalou, o koya e sa soli vei keda e na vuku ni dra ni Lami.

Me da goleva mada e ke, e dua tale na tiki ni yago raravisa – na yame.  Ni da kerea na veiubi ni dra i Karisito e na vuku ni yameda, na noda veivosaki kei na vosa eda vosataka, eda sa kerea tiko na Kalou me yadrava na noda vakayagataka na vosa e na veika ca, e na lasu, e na kakase, kei na veika tawa yaga eda dau kaya.   E a kaya ko Jisu,

“Ia ka’u sa kaya vei kemudou, A vosa ca vakayadua ga era na cavuta na tamata, era na tarogi kina e na siga ni lewa.

Ni ko na vakadonui e na vuku ni nomu vosa, ka ko na cudruvi e na vuku ni nomu vosa,” (Maciu 12:36-37).

Ko Jemesa na taci Jisu, e a volavola ka kaya,

“Sa vaka talega kina na yameda ni sa tikida lailai ga, a sa vosa vakaviavialevu.  Raica sa vakacaudreva na buka levu na bukawaqa lailai!

Ia sa bukawaqa na yameda, a ka taucoko ni ca: sa vakakina na yameda e na veitiki ni yagoda taucoko, a sa vakacaudreva na ivalavala kecega ni yagoda;  a sa vakacaudreva oqori ko eli.

Ia ka sa sega na tamata sa vakamanoataka rawa na yame; a ka ca sa sega ni tarovi rawa, sa sinai e na ka gaga e dau veivakamatei,” (Jemesa 3:5-6,8).

Na apositolo ko Paula, e vakasalataki keda talega,

“Dou kakua talega ni dau didi, me vaka era sa didi e so a ra sa vakarusai  (mai vua na) dauveivakarusai,”  (1 Korinica 10:10).

Ni da soro ki na kaukauwa nei Karisito ka tiko e lomada e na vuku ni Nona dra, e soli vei keda me da rawa ni veisautaka na yame ka sega ni lewai rawa, me icabocabo-ni-soro ni vakarokoroko kei na vakavinavinaka.

“Ia ko koya oqo me da qai vakacabora tikoga na imadrali ni vakavinavinaka vua na Kalou e na vukuna, oqori na vua ni tebe-ni-gusuda, ni da tusanaka na Yacana,” (Iperiu 13:15).

Na veika talega eda raica, e dodonu me tauvuloni e na rarama ni dra i Jisu Karisito.  Oqo e okati kina na TV, na internet, na magazine, video, DVD, yaloyalo yavala, kei na ivola.  Na veika kece eda dau cakava me da vakawelei keda tu kina, o ira na veika e rawa ni vagolea tani na noda vakanamata, mai na inaki kei na itovo vaKarisito, e dodonu me da lako tani mai kina.

Na veika talega eda raica, e dodonu me tauvuloni e na rarama ni dra i Jisu Karisito.

E na Jope 31:3, eda wilika kina ni a veiyalayalati kei na matana ko Jope, me rawa kina ni cakava na ka e dodonu e na mata ni Kalou, (Jope 31:1, 7-8).

NODA VAKATULEWA ME DA VEISAU

E na noda sa vakatulewa me da veisautaki me da ucuya na yaloyalo i Karisito, eda sa vakayacora tiko kina e dua na iwase levu ni inaki ni dra ni veivueti i Jisu.  E a voli keda na Kalou me da lomani Koya ka qaravi Koya, me vaka na Nona lomani Koya ka qaravi Koya ko Karisito.

E na gauna era a vakacabora kina na isoro ni caka cala vakacala-ka na Isireli e na gauna vakaMosese,

“Ia me vakama (na uro) ko koya na bete e na dela ni cabocabo-ni-soro me ka boi vinaka vei Jiova (Vunau Ni Soro 4:31).

Oqo e vakaibalebaletaki tiko ki na kena cabori na tikina vinaka ni tamata, na kena iwase ka rawa me veisautaki, ki na buka ni veivakasavasavataki ni Yalo ni Kalou kei na Nona loloma, me rawa ni vakavoui kina na tamata e loma, e veisiga yadua, mai vua na Yalo Tabu ni Kalou, me yacova na gauna e sa veisautaki kina ki na nodra lagilagi na luve ni Kalou.

Me rawa ni vakavoui kina na tamata e loma, e veisiga yadua, mai vua na Yalo Tabu ni Kalou, me yacova na gauna e sa veisautaki kina ki na nodra lagilagi na luve ni Kalou.

E na sala vata o ya, eda sa rawa ni solia noda bula vua na Kalou, me da vakila kina na veivakasavasavataki ni Nona Yalosavasava kei na Nona loloma. E na sala oqo, e sa na qai serauna lesu kina na noda bula, na lagilagi ni Kalou, e na vuku ni dra ni Lami.

 

Back to Table Of Contents

Posted in Uncategorized | Leave a comment

Wase 10 – NA DRA SA IWALI NI LEQA, MAVOA KEI NA TAUVI MATE

“Ia sa we ni kena kuita dou sa vakabulai kina.”

1 Pita 2:24

Au vakavinavinaka vua na Kalou e na dra talei ka a dave e na kauveilatai e na gauna makawa o ya, me daru vueti kina, o iko kei au, mai na ivesu ni lawa, ka me daru bula ga e na Nona loloma soli wale. Oqo e sega ni vosa ni tatadra walega, ia e sa dua na dina vakayalo. E a taura na dra i Jisu Karisito ka a dave e na kauveilatai me rawa kina ni nodaru na vakacegu, na veivakabulai kei na veisereki.

Na kaukauwa veivakurabuitaki ni Kalou e rau mai sota kei na nona kaukauwa na meca. E rau coqa mamaca na kaukauwa ruarua oqo, me vaka beka ni rau saqa e rua na  sitima ni vanua, ka qai kakaseresere vakamatailalai na nona cakacaka kece na tevoro.

NA NODA VUNIWAI LEVU

E na veigauna kece ko vosataka kina na dau-lewa ni dra i Jisu Karisito, ka ko qai tutaka na kaukauwa ni veiyalayalati vaKalou, a dua na ivalu levu e na valataki mai lomalagi kei vuravura talega. Ni ko tu vakadoudou, ka vakatusa na Nona vosa na Kalou bula, mo kila ni na yaco na veika lelevu:

E na yaca i Jisu, era na vakasavi na yalo velavela, ka ra na vakabulai na tauvi mate.  E na vuku ni dra, e na yaco na cakacaka mana, na veika e vuqa ka veivakurabuitaki, ka ra na yaco, mai na nodra cabo masu na Nona tamata.

E na yaca i Jisu, era na vakasavi na yalo velavela, ka ra na vakabulai na tauvi mate.

Eda sa raica oti mai, ni dra e i sasabai ka itataqomaki ni yago.  E valuta na veimate vakayago.  E sa iyatu e liu ni isasabai mai na kabakoro ni  veimanumanu ni mate e vuqa.  E solia e dua na ituvatuva maqosa ni tataqomaki mai na veika mai taudaku ka rawa ni vakavuna na leqa.

Ia, sa vakatalega kina na dra talei ni Lami, e na kena taqomaki ira ka ra sa ubi tu e na dra.  E solia na bula na Lami ka ni sa Vuniwai Levu o Koya.  E vakavuqa na noqu sa raica na nodra vakabulai na tauvi mate kei na lokiloki, e na yaca i Jisu kei na Nona dra mai na kauveilatai.

VAKABULAI E NA WE NI KENA KUITA

E na dua na siga, e a vosa vei au na Yalo Tabu, ka kaya vei au me’u lako ki na nodra vale-ni-bula na gone, me’u la’ki masulaka e dua na gone. Au sega ni kila e dua na gone ka curu tu e vale-ni-bula o ya, ia au a mani rogoca ga ka muria na ivakaro ni Yalo Tabu. E a tuberi au na Yalo Tabu me’u muria sobu na loma ni vale-ni-bula, ki na dua na rumu ka rogo tiko mai kina na nona tagi e dua na gone.  Au a curu sara ki na rumu o ya, ka’u sa tovolea sara me’u vakadulai koya.  E qai kaya vei au na domo i Jisu, “Mo biuta na ligamu e ketena, ka vakatusa na Noqu veiyalayalati ni dra e vukuna.”

Au a cakava me vaka e tukuni vei, ka vakalailai ga, sa lutu sara na nona moce na gone o ya.  E na nodratou qai vakadikeva e muri na vuniwai na nona x-ray, ratou kurabui ni ratou sa sega ni kunea e dua na mate vua na gone. E sa vakayacora na nona cakacaka na dra i Jisu Karisito.

E a kaya na parofita ko Aisea,

“Sa vakamavoataki ko koya e na vuku ni noda talaidredre, ka sa qaqi e na vuku ni noda caka cala:  sa tau vua na cudruvi sa vu ni noda veivinakati tale; ia e na we ni kena kuita eda sa vakabulai kina.”

E na tau kece ni kuita ka dresulaka na kuli ni dakuna, e a wali kina na kedra mate e udolu vakaudolu na tamata tauvi mate, kei ira era vakaleqai tu vakayago.  Era rai na mataboko e na kuita yadua ka tau. Era vosa na galu, era lako na lokiloki, ka vakabulai taucoko na veimataqali leqa ni yago duidui, e na kena tau na kuita yadua e yagona.

Era vosa na galu, era lako na lokiloki, ka vakabulai taucoko na veimataqali leqa ni yago duidui.

E na dua tale na gauna, au a vakasavi ira tiko na yalo velavela, ka’u veivesu ka veisereki tale tikoga,, ni’u a qai tekivu lomaleqataka e dua ka’u masulaka tiko, ni sega ni laurai vua e dua na veisau. E a qai vakauqeti au na Yalo Tabu me’u kaciva sobu mai vua na kaukauwa ni dra talei ni Lami.

Au sa tekivu kaya sara, “E na bula kei na kaukauwa e taukena na dra i Karisito Jisu, au sa taura tani vei iko na lewa Setani.  E na yaca ni Turaga, ko na sereka na tamata oqo ka laivi koya me lako. E na dra ni Lami ka a vakadavea me sereki keimami kina mai na kaukauwa ni meca, au sa taura me noqu na lewa ni veivakabulai.”

E na noqu vakatusa na dra ka taura na lewa ni veivakabulai, au sa tekivu raica sara na veisau vua na tamata o ya. Mai na gauna o ya, au sa vakayagataka wasoma voli mai na masu vata o ya e na nona vakauqeti au na Yalo Tabu. E na kaukauwa ka tu e na dra i Jisu, era sereki kina na tamata mai na i vesu ni yalo velavela, ka ra lako e na bula galala.  E vakabulai ira ka vakavinakataka na nodra bula na kaukauwa ni Kalou. Au sa bau raica talega na kena vakavinakataki na mavoa vakayago kei na kena vakacacani na lewe.

Mo karalaki Setani e na kaukauwa ni dra ni lami, ka na sega ni cakava rawa e dua na ka; ia e na dro tani ga. E sega ni rawa me tiko tale na meca e na gauna ko kacivaka ka tutaka vakadoudou kina na Vosa ni Kalou. E na we ni kuita kece nei Jisu, o ira na kuita warumisa ka a tau vei Koya me noda kina na veivakabulai – na Nona kaukauwa e se mana tu ga nikua, me vaka e na veigauna sa sivi yani. E na sega ni malumalumu rawa na Nona dra!

Back to Table of Contents

 

Posted in Uncategorized | Leave a comment

Wase 11 -NA VEISEREKI NI DRA

“Era sa rawai koya (Setani) e na vuku ni dra ni Lami, kei na vuku ni vosa era sa tusanaka.” (Vakatakila 12:11)

 

E na vuqa na veika e vakatakila vei au na Kalou me baleta na dra ni Lami, e dua na nuinui veivakararamataki ka sa dau vakayaloqaqataki au, ka solia vei au na kaukauwa levu, o ya, na dina ni sa noda isasabai na dra, me baleta na noda bula, ka vakakina e na ivalu vakayalo.

E na vuku ni Nona dra, e sa rawa kina me da qaqa mai na itovo vakayago  ka sa bula tu e lomada mai na gauna ni noda sucu. E na vuku ni Nona dra, eda sa rawa ni vorata na vuravura ka sinai e na ca kei na veivakatovolei; eda sa rawa ni vorata na veitemaki ni valavala ca, na veibeitaki vakailasu, kei na kaukauwa ni ca e na noda bula. Ka da sa rawa ni qaqa mai vua na meca, e na vuku ga ni Nona dra.  E sa tu vei keda na kaukauwa kei na lewa, me da buturaka sobu na dakui Setani, ka vakadrukai koya e na veisala kecega.

E sa tu vei keda na kaukauwa kei na lewa, me da buturaka sobu na dakui Setani, ka vakadrukai koya e na veisala kecega.

Na dra i Jisu e sa sereka na isoqosoqo lewe-ni-lotu, na kawatamata vou ni Kalou, mai na kaukauwa ni tevoro kei na veikaukauwa kece ni butobuto. Kevaka mada ga eda kosova na buca ni yaloyalo ni mate, e sa veirauti na Nona dra me kauti keda takoso e na Nona veitaqomaki.

Au a wilika tiko e dua na ivola ka vola ko Catherine mai Siena, o koya na marama ka a raivotutaka talega na siga ni Nona mate na Turaga.  E a raici Jisu ni sa duri mai na ibulubulu, ka sa veisau na kena irairai. E a serau ka totoka vakaoti na kena irairai, ka vaka e cila tu mai e na mavoa ni ligana na rarama serau.

E kaya o Catherine ni ra a sala vata kei Koya na agilosi, ka a raici ira na yalo velavela ni ra vesuvesu tu e na sinucodo e mata i Jisu. E na nona raivotu, e kaya o Catherine ni raica na Turaga ni duri tu e na kaukauwa levu kei na lagilagi. E a qai rairai mai e matana na tevoro, ka lako mai e na waqawaqa ni “dragon”. E rau qai tekivu veimulomulo kei Jisu e na veivala, ka yavalati vuravura kece na uneune levu mai na nodrau veimoqemoqe.

Ia, e a qai raica ko Catherine, na Turaga, ni taura na ulu ni “dragon”, biuta e bukubuku ni yavana, ka qai butuqaqia sobu ka vakadasilataka.  Ni sa oti o ya, e a qai kaliraka ko Jisu mai liga ni manumanu o ya, na idola (keys) kei mate, vata kei na idola kei eli.  E kaya o Catherine ni a rawa ga oqo e na vuku ni dra e a vakadavea ko Jisu.

NA IVADI NI MECA

E ka bibi me da kila vakavinaka na vuna e dodonu kina me da valuta na meca. Ni sa bulia oti na Kalou na vuravura vinaka vakaoti oqo kei na tamata tawa cala, e a qai yaco e dua na veisau butobuto.  E na Vakatekivu 3, eda wilika kina ni o rau na imatai ni tagane kei na yalewa, o rau ka rau a bula veilomani tu kei na Kalou, e rau sa nanuma me rau veitokani kei Setani, o koya ka bula veisaqasaqa tu kei na Kalou.

Ko Ivi, e a sotavi Setani ni lako mai e na waqawaqa ni gata.  E a qai veretaki Ivi ko Setani e na nona ilawaki veidabui. E na ivolatukutuku ni Vola Tabu, e dusia vei keda na Kalou ni da rawa ni raica ka kila na inaki ca nei Setani, na vere ka tini e na rusa tawamudu, kei na ivadi lawaki ca e dau vakayagataka me cakava kina oqori.

NA NONA TAKETE NABA DUA: ME TAWASEI KEDA TANI NA TAMATA MAI VUA NA KALOU

Na takete naba dua nei Setani, o ya, me tawasei keda tani na tamata mai vua na Kalou, me rawa kina ni da vakarusai. Na vuna e sa rui cata matemate kina na tamata o Setani, e kunei e na iVakatekivu 1:27:  “A sa bulia na tamata na Kalou mei tovo vata kei Koya; e na itovo ni Kalou sa buli koya ko Koya; na tagane kei na yalewa sa buli rau ko Koya.”

Na takete naba dua nei Setani, o ya, me tawasei keda tani na tamata mai vua na Kalou, me rawa kina ni da vakarusai.

Me vaka ni sa sega ni vakaiyalayala  na levu ni nona cudruva na Kalou na tevoro, e sa la’ki tinimaki vua na tamata na cudru oqo, na tamata ka buli e na yaloyalo vaKalou.  O koya eda sa yaco kina me da takete ni nona cudru kei na nona veisagai.  Me vaka ni sega ni rawa ni veivala vakamatanalevu kei na Kalou, e sa rawa ga me valuti Koya e na nona valuta na Nona ibulibuli – ka vakabibi na ibulibuli ka a buli e na iyaloyalo vaKalou.  Oqo na vuna e dodonu kina me da kua ni kidacala, e na gauna eda yaco kina me da takete ni nona cudru kei na nona veiveretaki.

E a tauyavu e dua na veitokani  e na kedrau maliwa na tamata, vata kei Setani, ka sa vaka beka na nodrau veimaliwai e dua na laione daukata kei na dua na lami luve-ni-yali.

Me tekivu mai na siga butobuto o ya, e na nodrau a rogoci Setani ko Ivi kei Atama, e a sa tekivu vakasasataka voli mai na tamata na tevoro “me vaka na laione sa tagi, a sa vakasaqara e so me tiloma.” (1 Pita 5:8)

Au a yadra cecekala mai e na dua na bogi, ka’u qai raica ni sa boro damudamu kece tu na noqu rumu – na lalaga, na buturara, ka bau vakakina na veika kece e tautuba. Ni’u rai ki tuba, au a raica ni sa viribaita tu na noqu itikotiko e dua na bai.  E a qai drodrovi au mai na vakacegu ni Kalou, ka qai vosa malua mai, “Au na viribaiti iko e na lalaga bukawaqa luvequ, ka’u na  vakarurugi iko, ka taqomaki iko, ka wanonovi iko.  Au na cakava oqo vei ira kece na luvequ era lomani au ka talairawarawa ki na noqu vunau kece.”

Au a davo sobu tale ka’u moce, ka’u yalodei ni’u kila ni yadravi au tu na Kalou.

Au a qai tekivu raica na bukawaqa, na lagilagi kei na kaukauwa ni Kalou, e na kena yaco me bula mai na Vosa ni Kalou.  Au a raica na dra i Jisu ni kovuta tu na veika au sega tu ni bau kila ni rawa ni kovuta. E vaka e dua na isasabai ka veitaqomaki tu. E veivanua au lakova me’u la’ki vunau kina, au dau tukuna tu ga na dra ni Lami, baleta ni sa kaukauwa dau veimaroroi ni Kalou.

Me baleta na yaloyalo vaKalou ka tiko vua na tamata, ka baleta talega na veitaqomaki e solia ko Jisu vei ira na tamata vakabauta e na vuku ni dra, na ivadi e vakayagataka ko Setani me valuti keda kina, e sa yalani ga ki na veitemaki, veivakatovolei kei na ilawaki.  Ia, na ivadi kece oqo e sa yaco me ra coriti ka vakabobulataki tu mai kina e milioni vakamilioni na tamata e na veitabayabaki sa sivi yani. Oqo na italanoa vakaloloma ni veigauna!

NA ITAVI RAWARAWA NEI SETANI

Ni da raica vakamatua sara, e sega ni  dredre na cakacaka nei Setani, baleta ni sa noda itovo tudei na tamata me da goleva na ivalavala ca. E sega ni rawa ni vakasaurarataki keda o Setani me da caka cala, ia e rawa ga ni vakayagataka e so na ilawaki me da tarabe kina. Mo nanuma tiko ni vakatarai ga vua me veitemaki, veivagarogaroi ka veidabuitaki keda.  E na noda soro vua, sa ikoya na garogaro ca ka tu e lomada, o koya e vakavuna me da talaidredre kina vua na Kalou.  E kaya vei keda na iVola Tabu:

“Ia sa dau veretaki na tamata yadua, ni sa vecei koya na nona garogaro ca ka bacani koya. Ni sa qai kunekune na garogaro ca, sa vakasucuma kina na ivalavala ca: a sa oti na ivalavala ca, sa qai vakasucuma na mate.”

(Jemesa 1:14-15)

O Setani e sa nakinaki tiko me tudaitaki iko kei au.  E na so na gauna,  e na lako mai e na sala e malua ka veivakawelei, ka so na gauna e na basika mai vakamatanavotu.  E nona loma-ni-bai ni cakacaka na vuravura taucoko. Na vuravura sa ikoya na vanua eda bula, vakasama ka cakacaka kina. Na noda bula e bulataki me vaka na drama e na 24 na auwa ni veisiga, 7 na siga e na veimacawa.  Eda sotava na veisaqa vakadomobula e veisiga.

VALUTI MAI VEI IRA NA “KAI FILISITIA”

Ko ira na meca kei Isireli, o ira na kai Filisitia, era dau kabakoro vei ira na tamata ni Kalou e na veigauna era raica kina vei ira e dua na malumalumu. Na iVola Tabu e boroya e dua na iyaloyalo me baleti ira, me tukuni ira tiko ni ra ivakatakilakila ni veika vakavuravura ka dau latilati, veisaqa ka vakabobulataki ira na tamata ni Kalou.

Sa vakakina ko Setani, e na nona dau solia na kaukauwa kei na yalodoudou ki vua e dua ka kune vua na  sore ni gagadre me valuti ira na tamata ni Kalou. E sega ni dau yalolailai, ka sega vua na tu vakasuka mai na nona dau beitaka, vakayalolailaitaka kei na nona tovolea me vakadruka na tamata vakabauta.

Ia, e tiko e dua na itukutuku vinaka! E sa solia oti tu vei keda ko Jisu na Nona Vosa ni yalayala, ni da na sega ni malumalumu ni da sotava na voravora ni meca kevaka eda vakararavi Vua.  E sega na kaukauwa tani me na tara rawa e dua ka vakararavi ki na Nona lewa e na vakabauta. E a kaya na parofita ko Aisea,

“Na iyaragi kecega sa caka me kemu e na sega ga ni yaco; kei na yame kecega e na mai veilewai kei iko ko na vakacala ga. Oqo na nodra ivotavota na tamata i Jiova, kei na nodra veivakadonui mai vei au, sa kaya ko Jiova.” (Aisea 54:17)

Eda na sega ni malumalumu ni da sotava na voravora ni meca kevaka eda vakararavi Vua.

Au sa vulica ni dodonu me’u valuta na meca e na kaukauwa ni yaca ni Turaga kevaka au vinakata na qaqa.

“Sa dina ga sa vakayago na neitou bula, ia keitou sa sega ni vala me vaka na ka vakayago, ni sa sega ni ka vakayago na neitou iyaragi, ia sa kaukauwa ga e na vuku ni Kalou me talaraki kina na bai ni valu kaukauwa; sa talaraka sobu kina na veinanuyaki , kei na ka cecere kecega sa vakalevulevui me vorata na vuku ni Kalou, ka sa vakamalumalumutaka na nanuma kecega, me talairawarawa vei Karisito,” (2 Korinica 10:3-5).

Ko ira na ito ni veikaukauwa ni butobuto, era ia tikoga na veibolei vei ira na tamata ni Kalou.  Na bai ni dra sa ikoya na vanua e ia tiko kina na veivaluvaluti. E sega ni malumu rawa na veivaluvaluti kei na ca.  E dau vakawasoma ni na lako mai na veisaqa ni meca e na waqawaqa vakatamata. Eda ia tiko na veisaqasaqa kei ira na meca ni bula savasava vakayalo e na noda veitikotiko. Eda veivalutitaka tiko na dina.  Eda valuta tiko na vei itovo kei na veivakarau dukadukali ka ra cakacaka ka bula tiko e na keda maliwa.  Eda veivala tiko kei na veitabakisobu kei na kena yali na lewa dodonu.

Na veisaqa tawamudu oqo kei ira na meca ni yaloda,  e sega ni baleti keda yadudua ga, ia e ivalu talega me baleti ira na noda veimatavuvale kei na noda veimatanitu. Ko ira na qarava tiko na kena bisinitaki na wai-ni-mate ni gaga (“drugs”), kei na kena bisinisitaki na veika baleti ira na yalewa ca (“pornography”), era sotia  ni mataivalu ni Filisitia e daidai. E vakakina na veivalenibula era cakava na vakalutugone.  O ira era tokona ka vakauqeta na vakatoroisobu ni noda bula savasava vakayalo, sa i ira oqo na kai Filisitia ka ra wawa tu e daku ni bai ni dra, ka ra bosebose tiko me ra vakarusa na noda veimatavuvale kei na noda veimatanitu.

Au vakabauta ni sa gauna oqo me da sa tucake kina na tamata vakabauta kece, ka me da vosa cake mai. E sa sega ni gauna oqo me da tikolo tiko kina. Vosa cake mai mo saqata na veika ca. Sa dodonu me da tu ka saqata vata e matanalevu na veika e basuraka sobu tiko na veilawa ni noda veitikotiko, na veika e sa vocia tani tiko na noda tiko bulabula vakayalo.  Kevaka eda kila se segai, na meca e waraki keda tu e na daku ni bai ni dra e na veisiga kece.

E na dua na gauna, au a vunau tiko e na dua na lotu, ka a qai vakauqeti au na Turaga me’u kauwai vakalevu vei ira na turaga ka ra tiko e na sokalou o ya. Au a vunautaka tiko na bula ni garogaro ca kei na ivalavala ca ni rai lo, na veika ca e da dau vakayagataka kina na ligada kei na yagoda. E a qai tekivu cakacaka na Yalo Tabu e lomadra na turaga, e na dua na sala e tatara vakatitobu, ia e na loloma talega. Au a kaya vei ira ni se tiko na inuinui e na vuku ni yaca i Jisu. E se rawa ni ra vueti mai na veivakabobulataki ni yalo velavela ka vakadrukai ira se vakatotogitaki ira tu.

E na noqu tekivu tukuna na kaukauwa ka tu e na yaca i Jisu kei na dra ni Lami, au a qai raica e dua na ka veivakurabuitaki e daku ni vale-ni-lotu. Oqo e dua na ruve levu, e damudamu na rokana, ka sa vakasinaiti tu e na kaukauwa.  E na nona sa tekivu veivukayaki e loma ni vale, e a qai tekivu vakalutuka sobu mai e vuqa na polo bukawaqa.  E na gauna e lutuki ira kina na tamata na polo, au qai raica ni waki tu kina na dra kei na kubou ni buka. Era a qai tekivu tucake na tamata e lutuki ira na polo bukawaqa, ka ra kailavaka mai na nodra sa vakatusai ira, “Au gadrevi Jisu me sereki au. Au sa veivutuni!”

E dua na ruve levu, e damudamu na rokana, ka sa vakasinaiti tu e na kaukauwa.

Ni ra sa tekivu lako cake mai ki liu na tamata, era a qai vakasilimi ka savai vakayalo e na dra ni Lami kei na Vosa ni Kalou.  E sa bau dua na cakacaka veivakurabuitaki ka totoka ni Kalou. E vica na drau, na levu ni tamata era a vakabulai vakayalo e na siga o ya.  E na neimami vakatusa na Vosa ni Kalou, e a qai kauta mai na veisereki kei na inuinui na kaukauwa ni Yalo Tabu.

Eda sa bula tiko oqo e na maliwa ni dua na itabatamata dukadukali vakayalo. E dodonu me da cakacaka vata kei na Kalou e na kaukauwa ni Yalo Tabu, me da cakava na lewa nei Tamada.

NA VEISEREKI E NA VUKU NI KAUVEILATAI

E na noqu dau vunau e na veivale ni lotu, au sa vulica,  ni veivanua au raivotutaka kina na bukawaqa ni Kalou me kovuta tu na itutu ni vunau, e na basika e na siga o ya na veisereki. Au dau raici ira na agilosi ni ra mai tabaka e ligadra na itutu ni vunau, ka vakarokoroko vua na Kalou. E vakawasoma na noqu sa raici ira me ra laveta cake tu e dua na ligadra (e so na gauna, na ligadra ruarua) me ra vakacerecerea kina na Turaga.

Au sa qai dau lesuvi ira tale na veivale ni lotu ka’u sotava kina na veika oqo, ka dua na siga, ni caka tiko na lotu, e a qai drodro mai vakayauyau na lagilagi ni Kalou e na dua na raivotu veivakurabuitaki.  Au qai raici ira na agilosi ni ra sa curutaka mai ki loma ni valenilotu e dua na kauveilatai vakaitamera: rauta beka ni 15 na fute na kena balavu. Era sa qai kauta cake ki na itutu ni vunau ka sa kovuti tu e na bukawaqa. Era sa qai vakekeli wavoki e na fuloa ni valenilotu, ka ra qai tekimaka na kauveilatai e mata ni tutu ni vunau. E wararasa na irairai ni kauveilatai o ya, ka qai vaka e vanataki tu mai na bukawaqa e na kena buku tolutolu.

Au sa raica beka vakatolu na raivotu oqo, ia e na veigauna kece au raica kina, e dau basika mai na veisereki levu ki na nodra bula na tamata. E vuqa na tamata era dau vakauqeti me ra lako cake mai, me ra vueti ka vakabulai e na sala e veivakurabuitaki.  E sa dua na ka vakatubu qoroqoro ni da raica.

Au a qai dau vakananuma na veika au a raica, ka’u qai tekivu taroga na Turaga, “Kemuni na Kalou, na cava na ibalebale ni veika kece oqo e na nomuni Vosa?” Na kena isau au qai rogoca, e vaka koto oqo,

“Na itutu ni vunau kece ko raica ni kovuti tu e na bukawaqa, e dusia ira tiko na veivalenilotu ka vunautaki tiko mai kina na Noqu Vosa dina. Ko ira na italatala lumuti yalosavasava oqo, era vakasavasavataki ira tiko na nodra qele-ni-sipi e na Vosa ni Kalou kei na kauveilatai ko dau raica. Oqo na vuna au sa vakadeitaka kina me biu na kauveilatai e na veivalenilotu o ya, ka sa tiko kei ira na Yalo Tabu me dau veisereki, ka me vakayacora kina na yalayala ni Vosa ni Kalou. Oqo na ivakatakilakila ni na yaco na veika era sa dau kerea oti vei Au me’u cakava, ka sa ivakaraitaki talega ni ra sa vunautaka tiko na Vosa savasava ni Kalou e na vuku ni kaukauwa tawamudu ka tu e na kauveilatai.”

E vuqa na vanua au dau lakova e Amerika, au dau sotava kina na raivotu oqo. Ni’u dau vakasaravi ira na agilosi ni ra cakacaka tiko, e vaka beka ni’u sarava tiko e dua na iyaloyalo yavala.  E vuqa na vanua, au na raici ira na agilosi ni ra basika mai me vaka beka e dua na ilala tamata dausasamaki, ka ra na tekivu taviraka tani ki tautuba na cakacaka kece ni yalo velavela mai na loma ni valenilotu. Era na vakaramusutaka na sinucodo e vesuki ira tu na tamata, ka sereki ira.

Ni’u dau vakasaravi ira na agilosi ni ra cakacaka tiko, e vaka beka ni’u sarava tiko e dua na iyaloyalo yavala.

E na dua na sokalou, era a veitaba tiko e so, ka gauna e sa la’ki sava kina na itaba, e qai laurai na bukawaqa ni vakavolivoliti ira tu na tamata keimami a masulaka tiko.  E damudamu dina na kena roka, ka’u marau ni’u kila ni oqori e dusia tiko na kena vakatakilai na dra i Jisu. E vakadrukai au ni’u raici ira na agilosi ni ra cakacaka tiko e na Nona loma-ni-bai vakayalo na Kalou. Dina beka ni’u qoroqoro vakalevu e na veika au raica, ia e a sega ni yaco oqo e na veivale-ni-lotu kece, se sokalou taucoko.

E na dua tale na siga, e na noqu a masumasu tiko, e a qai tekivu vosa vei au na Kalou me baleta na veika e sa vakatakila tiko vei au.

“I na luvequ, e dodonu mo vulica ni vuqa na gauna au na solia vei iko e dua na raivotu, ia e sega ni kena ibalebale ni veika oqo era tu sara ga e matamu. Era dusia tiko na veika e se bera mai, se na veika e yaco tiko e na dua tani na yasa  ivuravura. Vakarorogo vei Au, ka’u na qai vakatavulici iko e na itovo ni masu mo taurivaka.

E na so na gauna, era na raica na raivotu na tamata, ka ra na nanuma ni veika era raica, e sa yaco sara tikoga e yasa ni nodra imocemoce.  Era na nanuma ni sa yaco sara tikoga e loma ni nodra rumu, ia e sega ni vakakina.  Au sa Kalou vakayalo koi Au, ka’u na dau taqomaki ira na luvequ.  Au vakaraitaka tiko vei iko na dina kei na veika tawa kilai rawa, me rawa ni ko vakatakila ki vuravura raraba.

Au vakaraitaka tiko vei iko e dua na cakacaka ni meca, ko Setani, me rawa ni ko masu; e na qai soli mai na dra ka a dave – na dra ni veiyalayalati – e na sovaraki mai me latia na veisala vuni e dau muria na tevoro.”

E a malaude na yaloqu! Au mani sauma yani, “Sa vinaka Turaga.”

E toso tiko na gauna, ka mani dua na siga, au a lako ki Phoenix me’u la’ki vunau e na dua na soqo. E so vei keimami,  keimami a vakacabo masu tiko me baleta na koro oqo.  Keimami a sa cegu e na neimami masumasu, ka keimami a sa davo me keimami moce. Ia, au a qai duri cecekala mai ni rauta na tolu na kaloko e na mataka caca. E vaka ga ni’u a sa yadra tu me vica na auwa.

Au rai cake ki doka ni rumu, au qai raica e dua na ka ni sa tekivu rairai mai. Na ivakatakarakara ni dua na ka tani e curu basikata mai na doka ni vale. E vaka na ibulibuli ni kato, ka mai cirri wavoki tiko. E na dua na mua ni kato o ya, au raica kina me vaka e dua na katuba lailai, ka rauta ni walu na idi na kena balavu, ka tinikarua na idi na kena raba.

Ni’u rai yani e loma ni katuba o ya, au raica sara e dua na dauvakaluve-ni-wai ni dabe toka e na teveli, ka vakararai tiko e loma ni nona polo kirisitala (crystal ball). Au vakila ni rawa ni raica e na nona polo na vanua au tiko yani kina. Au kila talega ni vakatara na Kalou me’u raica na veika oqo, ka vakatara talega na yalewa o ya me cakava rawa tiko na cakacaka oqo, me vakaraitaka kina vei au na itovo ni masu cava me’u taurivaka.  Au tobotoboka sara vakatotolo na veika kece au a raica tiko oqo. E mani tasogo na katuba lailai o ya, ka sa ciri tani sara na kato o ya mai na rumu au tiko kina.

Au raica sara e dua na dauvakaluve-ni-wai ni dabe toka e na teveli, ka vakararai tiko e loma ni nona polo kirisitala (crystal ball).

E na noqu duri cake, au taro sara, “Turaga, na cava na ibalebale ni ka au raica o ya?”  E qai kaya vei au na Kalou,

“Au vakaraitaka tiko vei iko na nona iwalewale na tevoro. E vuqa sara na vakaluve-ni-wai, era qarava tiko na cakacaka ni tevoro e na yasana oqo, ka ra taukena kece na polo kirisitala vaka o ya.  Era sa vulica kece na iwalewale me ra rawa ni vakamuria na veisala vuni e macawa lala, ka me ra rawa ni rai lo ka dikeva na veivanua ka sega ni veiubi tu kina na dra ni Lami. Na veiubi ni dra e rawa duadua ga ni soli e na masumasu, na vakabauta, kei na veiyalayalati ni Kalou.  E vuqa e sega ni ra vakabauta na Noqu veitaqomaki, me vakataki iko.

Ni veiubi tu na Noqu yalododonu vei ira na luvequ, ka ra bulataka tu na bula savasava e Mataqu; ni ra saga kaukauwa me ra bulataka na bula savasava vakaoti, na Noqu veiyalayalati – na veivakaduavatataki- e sa tu e na vukudra kei ira na nodra vuvale. Se vanua cava ga era tu kina, ka vakakina ko ira na luvedra, e dua na bai ni veitaqomaki e na viribaiti ira tu.

E vuqa era sega ni vakabauta qo,  ia o iko, au kila ni ko vakabauta.  Au sa vakadinadinataka vakavuqa vei iko e na vukudratou na luvemu kei ira na wekamu. Sa vuqa na gauna au sa vueti ratou kina na nomu vuvale mai na veika ni leqa e takosova na nodratou sala.

Na Noqu veiyalayalati – me isau me baleta na vakabulai ni yago, na dra ka a dave e na rua na udolu na yabaki sa oti – e se dei tu ga nikua. Na Noqu veiyalayalati e baleti iko kei ratou na luvemu.

Na kato ko a raica, ka laurai tu e babana  e dua na katuba, e dusia tiko e dua na icurucuru ka dodo mai na polo kirisitala o ya,e na nodra sala na yalo e macawa lala, me yaco mai ki nomu vale.

Au a vakatarai iko mo raica na kena mai ciri wavoki voli e ke, me’u vakavulici iko kina e na itovo ni masu mo taurivaka. Vakasarava vinaka qo, ni’u vakaraitaka tale vei iko e dua na ka.”

E a qai dolava na mataqu me’u raica e dua na ka e vaka e dua na “screen” levu ni TV. Au raica sara kina na mata ni dua na yalewa, ka sa bau matata vinaka vei au, ka kevaka au sotavi koya e gaunisala, au na kilai koya sara ga. E laurai vinaka kece na yagona, ka ni vakararai tiko e loma ni nona polo kirisitala, Add an Imageka qai kaikaila tiko e na domoilevu.

E a qai basika mai vakasauri na tevoro, ka sa kaikaila tale ga mai e na cudru levu, “Na cava ko vakatara kina me raici iko o ka o ya?!!  Na cava na vuna, tukuna mai vei au?!!!”

E a qai basika mai vakasauri na tevoro, ka sa kaikaila tale ga mai e na cudru levu.

E rau sa tekivu veileti e na domo e sinai e na cudru, ko koya na yalewa kei na tevoro. Au a qai rogoca ni kaya na tevoro vua na yalewa ni sa rui gusu levu ka sega ni rawa ni maroroya e dua na ka. Na tevoro – sa dua na ka na kena vakaitamera ni’u raici koya tiko – e a qai taura na lalaga ni vale, ka qai kurekuretaka, ka kaikaila e na levu ni nona cudru.  Sa qai curu ki tautuba, ka qai vosa mai vei au na Kalou,

“Vakatusa na dra! Vakatusa na dra i Jisu, na dra ka a vakadavea! Na bula kei na kaukauwa ni dra i Jisu ka a dave e na rua na udolu na yabaki sa oti, e se sega ni malumalumu e na cakacaka ni tevoro vakaoqo.  E kaukauwa cake na dra mai vei ira na polo kirisitala ka ra idewadewa ni nona cakacaka na tevoro. E rawa vua na dra me latia na veikatuba ka nodra i curucuru na mataqali oqo.”

Au a mani cakava na ka e kaya vei au na Turaga baleta ni’u a vakabauta kece na veika e kaya vei au. E na noqu tekivu masumasu, au a raica na kubou ni waki vata tu kei na dra. Au a qai raica na kaukauwa ni Kalou ni vukatubu sobu mai macawa ka qai lutuka ka vakacabotetaka na polo kirisitala nei koya na yalewa o ya.  E a veiciciyaki e loma ni vale e na nona kidroa na yalewa; ni qai samuta tale nona itikotiko na kaukauwa vaKalou, e sa cici sara ki tautuba me dro tani mai kea.

E qai kaya vei au na Turaga, “Mo la’ki masu e na veivanua kece au na talai iko kina, me vaka na kena o cakava e ke. Masulaki ira sara ga e na gauna oqo, ko ira kece era vakayagataka tiko na polo kirisitala vakaoqo.”

Au a qai masumasu tiko me dua na gauna dede. E a vakaraitaka vei au na Turaga na itovo ni masu me’u taurivaka mai na iVola Tabu, na veivauci kei na veisereki (raica na Maciu 18:18), na sala me’u tusanaka kina na Nona dra talei, ka me’u vakararavi ki na Nona yalayala kecega.  E veigauna kece au cakava kina na veika oqo, e basika na veisereki levu e na nodra bula na tamata.  E na raivotu, au raici ira na agilosi ni ra vakacerebutaki ira e vuqa na meca ni tamata ni Kalou. E na dua na raivotu, e rauta ni tini na udolu na yalo velavela era dui cerebu e na dua ga na gauna.

Au a raici ira talega e vuqa ka ra vakabobulataki tu vakayalo ni ra sa sereki. E vaka ni sa tubu viribaiti ira tu na dali kei na kausala. Ia ni lauti ira na bukawaqa, e a qai kakaseresere na kedra ivesu. Au kila ni vakaraitaka tiko vei au na veika veivakurabuitaki oqo na Kalou e na kaukauwa ni Nona Yalo Tabu. Au qai kaya lo. “ Kemuni na Kalou, ko ni sa dua na Kalou dau veivakadrukai dina!”

E vaka ni sa tubu viribaiti ira tu na dali kei na kausala.

Au a qai raica na ruve ni Yalo Tabu ni vukatubu tu e macawa.  E sa qai tekivu vakasoqoni ira vata mai Vua na tamata e na cakacaka ni Yalo Tabu, ka sa dua na ka na noqu marau ni’u vakasarava tiko na veivakalougatataki ni Turaga. Au sa qai tekivu raica vakavinaka sara ni da sa tiko e na maliwa ni dua na ivalu vakayalo, e na kena valuta tiko na ca na vinaka.

NA TAURI LESU TALE NI VEIKA E BUTAKOCA KO SETANI

Au sa kila talega ni meca e dau curuma mai na loma-ni-bai ni noda sokalou kei na masumasu. E dau curutaki koya mai ki na noda masumasu, me vakalialia na veika ni Kalou. E dau kabakoro mai ki na vanua ni noda vakarokoroko.  Kevaka eda vakatara, e na mai vakatawana na veivanua e sega ni nona. E dau curutaki koya mai vakadoudou ki na iyalava ni Kalou, ka nakita me taura na veika kece eda vakatarai koya me taura. Ia, e sega ni dodonu me da soro vua. Na dra i Jisu e sa vakatarai keda me da taura lesu mai vei Setani, na veika e a butakoca mai vei keda e na nona ivadi duka kei na lawaki ca. E na vuku i Karisito, eda  rawa ni bulataka na bula vakacegu e vuravura.

“Ni sa vinakati me sinai ko koya e na ka kecega; ka me vakaveivinakatitaki ira kaya na ka kecega e na vukuna, ni sa ia mada na ka ni veivinakati e na Nona dra ni sa lauvako ki na kauveilatai; io e na vukuna ga, se ra tu e vuravura se ra tu mai lomalagi” (Kolosa 1:19-20).

E na dua na gauna, au a masulaka tiko e dua na goneyalewa lailai yabaki tinikarua.  E a vesuki koya ka kucuvi (raped) koya e dua na tamata.  E na noqu masulaki koya tiko, e a qai uqeti na lomaqu me’u kaya me tauri na kena itaba na gone oqo. Au a mani vakaduri koya me ravi e lalaga me qai taba.  E na gauna e qai sava kina na “film”, e a qai laurai ni boro damudamu kece tu na lalaga vulavula ka a ravi tu kina.  E a qai vosa malua mai vei au na Turaga ka kaya, “Oqori na Noqu dra, e sa vui koya ka vakasavasavataki koya.”  Me vakacerecerei na Kalou e na vuku ni dra ni Lami!

Au vakabauta ni sa veikacivi ni Kalou e na noqu bula me’u saqata na lasu ni tevoro.  E na vuqa na veivanua kei na veiyanuyanu e veiyasa ivuravura, au sa vakayacora kina na veikacivi oqo.

Au nanuma lesu e dua na gauna ni a vakabobulataki tu na luvequ e na wai-ni-mate gaga, ka’u a masulaka tiko me sereki koya na kaukauwa i Jisu. Au a qai raivotutaka na ivalu era veivala kina na ito nei Setani kei ira na agilosi ni Kalou, e na vuku ikoya na luvequ.

Au a qai raivotutaka na ivalu era veivala kina na ito nei Setani kei ira na agilosi ni Kalou, e na vuku ikoya na luvequ.

Au a qai tekivu masu, ka solia vei au na Yalo Tabu na kaukauwa kei na vosa me’u kaya, “Na kaukauwa kei na bula kei na dra i Jisu Karisito, ka a dave mai Kalivari e na rua na udolu na yabaki sa oti, e se sega  ni yali na kena kaukauwa,” ka’u a qai taura me nona na vosa ni yalayala ni Kalou. Au a duri e na qaqa ni Vosa, ka’u durisaqata na tevoro, e na kena lako yani na Vosa me la’ki vala. Au a qai raica ni ra sa lokibuidra na tevoro kei na yalo velavela vua na Vosa.  E a curu mai me viribaiti luvequ na Kalou e na veigauna, e na vuku ni dra ni Lami.

E na dua na siga, e a buebue tu na yaloqu e na vuku ni ivalu vakayalo.  Au a masumasu vagumatua tiko vua na Kalou me veivuke mai. E na so na gauna, e sa tagiyaso na yaloqu ka’u sovaraka kece Vua na noqu yalobibi. E na noqu tagi tiko e na yalo bibivoro, au a vakamasuti Koya me solia mai na Nona veisereki. Au a sa veitaratara oti vata kei na so na sotia ni valu vakayalo, ka kerei ira me ra veitokoni mai e na masumasu.

E a qai vakasauri ni sa vosa mai vei au na Kalou. Au sa sega ni nanuma ke a vosa mai e na Domona me’u rogoca, se a uqeta mai na yaloqu. Na ka ga au kila ni a matata dina na noqu rogoca, ka ni sega ni vakataratutu na ibalebale ni veika e kaya vei au. Oqo na ka e a cavuta vei au:

“Mo yalodei, na luvequ; duri vakadua tu e na loma ni bai ni dra. E sega ni gadrevi mo na soli igu; ni sa i Au, na Turaga na Kalou, Au na vala e na vukumu.”

E na loma ga ni vica na sekodi, e a taluva kece mai vei au na noqu icolacola. E vaka beka na kena curu basikata mai na veio loaloa na matanisiga. E sa qai rawa me’u masu e na yalo galala kei na yalo e sa sereki. E a vukatubu na yaloqu, ka vuabale na noqu marau. Au a qai nanuma na tiki ni Vola Tabu e kaya,

“O koya oqo, oi kemudou na veiwekani, ni da sa qai doudou rawa me da curu ki na loqi tabu sara e na vuku ni dra i Jisu, e na sala vou ka bula, o koya sa qai vakatara vei keda ko Koya, ia sa ka e curu kina na ilati, oqori na Yagona; ka ni sa dua talega na noda Bete Levu e na vale ni Kalou; me da toro voleka yani e na yalo dina kei na vakabauta dina sara, ni sa kureitaki tu na yaloda me da kakua ni beitaki keda e na ca, ka sa vakasilimi tu na yagoda e na wai makare,” (Iperiu 10:19-22).

Back to Table of Contents

 

 

 

Posted in Uncategorized | Leave a comment

Wase 12 – NA DRA KEI NA MATANITU

Vei Koya sa lomani keda…a sa qisi keda me da tui ka bete vua na Kalou kei Tamana” (Vakatakila 1:5-6)

Na ivolatukutuku mai na itekivu ni veiqaravi nei Jisu, e wili talega kina na kena kacivaki na itukutuku ni a lako mai, ka vunautaka voli mai na itukutuku vinaka ni matanitu:

“Ia ni sa biu ki na vale ni veivesu ko Joni, sa lako mai ki Kalili ko Jisu, a sa dau vunautaka na itukutuku vinaka ni matanitu ni Kalou, ka kaya, Sa qai yaco na gauna, a sa voleka na matanitu ni Kalou; dou veivutuni ka vakabauta na itukutuku vinaka” (Marika 1:14-15).

Sa lako mai ki Kalili ko Jisu, a sa dau vunautaka na itukutuku vinaka ni matanitu ni Kalou.

Na dra ni veivakaduavatataki nei Jisu, e sega ni kena inaki duadua ga me vakabulai keda, dina ga ni o ya na imatai ka vuana bibi taudua. Ia, e sa inaki talega ni Kalou me tarai cake na Nona matanitu. E na Nona ituvatuva na Tamada vakalomalagi, e semati tu na noda a vakabulai e na dra nei Karisito, ki na Nona matanitu, na vanua e sa lesia tu kina e dua na noda itavi bibi. Eda raica na isema oqo e na rua na tiki ni Vola Tabu oqo:

“Mai vei Jisu Karisito talega, na dautukutuku yalo dina,na ulumatua vei ira era sa tucake tale main a mate, kei na nodra Turaga levu na tui e vuravura. Vei Koya sa lomani keda, ka savai keda mai na noda ivalavala ca e na Nona dra dina, a sa qisi keda me da tui ka bete vua na Kalou kei Tamana; me sa ia vei Koya na vakarokoroko kei na lewa ka tawa mudu. Emeni.” (Vakatakila 1:5-6 emphasis added) .

“Oi kemuni sa yaga me kauta na ivola, me cecega talega na kena drega: ni kemuni a vakamatei, ka voli keimami e na nomuni dra mai vei ira kecega na veimataqali, kei na duivosavosa, kei na veimatanitu, kei na veivanua, me keimami nona na Kalou: ia kemuni s alesi keimami me keimami tui, me keimami bete talega, vua na neimami Kalou; ia keimami na lewa tiko e vuravura.” (Vakatakila 5:9-10)

E na vuku ni dra i Karisito, eda sa wili me da “tui, ka bete” vua na Tamada vakalomalagi. E na noda ilesilesi vakatui, eda sa lesi me da vakayacora na Nona lewa kei na Nona itovo e vuravura. E na noda ileslesi vakabete, eda sa lesi me da vakayacora na noda ilesilesi ni veivakalotutaki, e na noda kauti ira mai na tamata vua na Kalou, e na vuku i Koya na noda Bete Levu, o Koya na itaukei ni veiyalayalati vou.

 

KO IRA NA LEWE NI MATANITU NI KALOU

E na veitabagauna kece sara, na Kalou e a sa vakasoqona voli mai e dua na Nona kawatamata. Ko ira na Isireli, ka ra a kawa nei Eparama, era a sereki mai na veivakabobulataki e Ijipita e na vica na cakacaka mana ka a yaco e na ruku ni veiliutaki nei Mosese. E na ikatinikatolu ni senitiuri ni bera ko Karisito, e na veiliutaki nei Josua na isosomi kei Mosese, era a vakadrukai Kenani na Isireli, ka la’ki tawavanua e na yasana ka a yalataka vei ira na Kalou.

E na veiliutaki nei Josua na isosomi kei Mosese, era a vakadrukai Kenani na Isireli.

Na kena a tauyavutaki na kawatamata ni matanitu oqo, e a caka e na dra. Na ivola ni Lako Yani, e tukuna vei keda na nona sa siro ko Mosese, mai na ulunivanua ka a la’ki ciqoma kina na lawa, kei na nona sa kacivi ira vata mai na tamata, me vauci ira ki na dua na veiyalayalati kei na Kalou. O ya, na veiyalayalati ka a sitabataki e na dra.

“A sa lako ko Mosese, ka tukuna vei ira na tamata na vosa kecega i Jiova, kei na lewa kecega: a ra sa vosa vata na tamata kecega, ka ra kaya, ‘A vosa kecega sa kaya ko Jiova keimami na cakava.’ … A sa tala e so na cauravou mai vei ira na Isireli, a ra sa vakacabora e so na isoro kama, ka vakamatea e so na pulumokau, me imadrali ni veivinakati vei Jiova. …A sa taura na dra ko Mosese, ka kureitaka vei ira na tamata, ka kaya, ‘Raica na dra ni veiyalayalati, sa ia vei kemudou e na vosa kecega oqo ko Jiova” (Lako Yani 24:3,5,8).

Dina beka ni vosa oqo, Matanitu ni Kalou, e vosa ka kunei duadua ga e na Veiyalayalati Vou, ia na vakasama ni kawatamata ni Kalou, ka ra a bula ka vakarurugi tu e na ruku ni Nona veiliutaki e na dua na veiyalayalati, e vakasama makawa sara. Na matanitu ka a gadreva na Kalou me tauyavutaka vata kei ira era talairawarawa, e a tauyavutaki e na nodra a vakacabo isoro Vua. Na vakadavei ni dra, e a vakaraitaka na nodra gagadre me ra veiyalayalati kei Koya, ka ra a qai vakatabui me ra tamata ni Kalou e na kena kureitaki vei ira na dra.

Na matanitu e a tauyavutaki e na nodra a vakacabo isoro Vua.

Na “matanitu” e na kena se qai tauyavutaki, e a tekivu me tubu me matanitu vakapoliki e na kena a sa kabai oti ko Kenani, ka sa qai tubu vakalevu sara me matanitu dina e na ruku ni nodratou veiliutaki vakatui ko Saula, Tevita kei Solomoni. Na matanitu e rua, ko Isireli kei Jiuta, e rau a matanitu duidui ka cokovata talega, e rau a ivakaraitaki vakayago ni vakasama vakayalo ni dua na kawatamata kacivi, ka bula e na ruku ni  Nona veiliutaki vakatui na Kalou bula.

NA NODRA ITUKUTUKU NA PAROFITA

Ko ira na parofita ni Isireli, era a kila vinaka cake sara mai vei ira na lewenivanua – na veika bibi vakayalo ni matanitu ni Kalou. E a matata vinaka tu vei ira, ni gadreva na Kalou me ra bulataka na lewe ni Nona matanitu, na bula savasava ka dodonu. E dua na ilawalawa parofita yalododonu e na loma ni dua na udolu na yabaki, era a dau vunauci ira voli mai na kawatamata  bula dukadukali  ni Kalou, me ra veivutuni ka bulataka na inaki ni Kalou me baleti ira.

Dina ga ni’u rawa ni cavuti ira e vuqa na parofita ka ra dau vakatusa na nodra sega ni vakayacora na tamata na veikacivi ni Kalou ki na nodra bula, ia ko Jeremaia duadua beka, e dua ka kila vinaka na nodra calata na tamata na ituvatuva ni Kalou e na nodra bula, ka dau vunauci ira vakawasoma.

Ko Jeremaia, ka dau kilai tu e na yaca, na parofita dautagi, e a dau catacata na itovo ni bula ka sega ni vaKalou, ka dau bolei Isireli wasoma me bulataka na bula e kacivi kina. Baleta ni parofita raiyawa vakayalo cake mai vei ira na kena vo, e a raica vakatayaloyalo tu o koya e dua na siga vou kei na dua na veiyalayalati vou, o koya me na isosomi ni veiyalayalati makawa ka sa kasura ka tawa yaga. E a taukena o koya e dua na raivotu matata me baleta na matanitu vou ka na mai tauyavutaka na Tui e na basika mai.

E a taukena o koya e dua na raivotu matata me baleta na matanitu vou ka na mai tauyavutaka na Tui e na basika mai.

“Raica, sa kaya ko Jiova, e na yaco na gauna, ka’u na vakatubura kina vei Tevita e dua na Coke yalododonu, ia e na lewa e dua na Tui ka cakacaka yaco, e na ia ko koya e na lewa kei na cakacaka dodonu e vuravura: e na Nona gauna era na vakabulai kina na Juta, ia ko ira na Isireli era na tiko vinaka: ia oqo na yacana e na vakatokai kina, Ko JIOVA NA NODA YALODODONU.” (Jeremaia 23:5-6)

E so tale vei ira na parofita kilai levu, me vakataki Emosi kei Osea, era a vunautaka talega na itukutuku vata oqo: E gadreva na Kalou e dua na kawatamata ka ra rawa ni bulataka na bula e vinakata ka namaka mai vei ira.

Na parofita ko Sakaraia, e a parofisaitaka vakamatata na lako mai ni Mesaia, o Koya ka na vakaduria na matanitu tawamudu, “ia e na lewa ko Koya mai na wasawasa e dua ki na wasawasa e dua” (Sakaraia 9:9-11). E a vunauci ira na tamata ko Sakaraia ka kaya, ni dina ga ni ra sa sega ni dinata na veiyalayalati, ia era se vauci tiko ga kina baleta ni a tauyavutaki e na dave ni dra. E a vola vakaoqo ko Sakaraia:

“Ia ko iko, e na vuku ni dra ni nomu veiyalayalati ka’u sa sereki ira kina na kai nomu era vesuki, mai na ikeli sa sega kina na wai” (Sakaraia 9:11).

Me sala vata kei na vakuru ni nodra ivakasala me baleta na lewa ka na tau kevaka era bese ni muria na Kalou, era a wasea talega na parofita vei ira na tamata na itukutuku vinaka ni Nona veivakalougatataki na Kalou, kevaka era veivutuni ka vuki tale Vua. E dau vakavuqa na nodra vakadidivarataki ira na tamata ki na nodra ivunau na parofita. Ia, e dau vagauna ni tukuna ira e dua na iwase lailai ni tamata na iVola Tabu, o ira ka ra kukube matua ki na Vosa ni Kalou.

E cavuti e na Veiyalayalati Vou e dua na ilawalawa lailai, o ira ka ra rogoca na Nona itukutuku na Mesaia, ka ra ciqoma, ka ra sa yaco me isevu ni tamata me curu ki na Isireli vou, na matanitu ni Kalou ka sa namaki tu mai vakadede.

NA IBULIBULI NI MATANITU

Na matanitu ni Kalou e sa duidui sara mai vei ira na veimatanitu vakavuravura. Na veika e duidui kina, o koto e na ivakarau ni nodra digitaki na lewena, na lawa e vauca na nodra bula ni veisiga, kei na kena icavacava.

VAKASUCUMI MAI NA DRA

Na sala duadua ga e yaco kina e dua na tamata me lewe ni matanitu ni Kalou, o ya, me vakasucumi kina, ia e sega ni sucu vakayago. O Jisu e a vakatavuvulitaka, “E dodonu mo dou sucu tale” ( Joni 3:7). E muri, ni vosa tiko vei ira na Nona ilawalawa, e a qai vakamatatataka kina na kena semati na Nona mate, ki na nodra vakabulai kei na nodra sucu ki na matanitu, ko ira era vakabauta:

“Sa qai kaya vei ira ko Jisu, ‘E dina, e dina, au sa kaya vei kemudou, kevaka dou sa sega ni kania na lewe ni Luve ni tamata, ka gunuva na Nona dra, sa sega vei kemudou na bula. O koya sa kania na lewequ, ka gunuva na noqu dra, sa rawata na bula tawa mudu; ia ka’u na vakaturi koya cake e na siga mai muri. Ni sa kakana dina na lewequ, a sa ka-ni-gunu dina na noqu dra. O koya sa kania na lewequ, ka gunuva na noqu dra, sa tu vei au, koi au talega sa tu vei koya” (Joni 6:53-56).

‘E dina, e dina, au sa kaya vei kemudou, kevaka dou sa sega ni kania na lewe ni Luve ni tamata, ka gunuva na Nona dra, sa sega vei kemudou na bula. ‘

Na vosa oqo nei Jisu, era a lomatarotaro vakalevu kina na tamata, ka so vei ira, era lecava ni vosa vakaibalebale, ka ra vakadewataka me sa vakayago. Ia kevaka eda raica mai na rai ni kena tauyavutaki na iVakayakavi ni Turaga, e na rawarawa kina me da ciqoma, ni a vosa tiko ko Jisu e na veiwekani ka basika e na vuku ni Nona mate.

E a sega ni vakauqeta tiko ko Jisu me caka na veikanikani; ia e a kaya tiko ni kevaka era ciqoma ka vakabauta na tamata na Nona cabora na yagona ka vakadavea na Nona dra, era na sucu vou, ka ra na sucu e na dra – sega ni sucu vakayago, ia e sucu vakayalo, ka yaco rawa ga e na vuku ni vakadavei ni Nona dra.

Na cakacaka ni papitaiso, e sa qai yaco me ivakatakilakila ni sa curu e dua na tamata vakabauta ki na veiyalayalati vou.  E a vakamacalataka ko Paula e na Roma 6:4, na bibi ni papitaiso:

“O koya eda sa bulu vata kaya kina, ni da sa papitaisotaki ki na nona mate: me vaka sa vakaturi cake tale mai na mate na Karisito e na kaukauwa nei Tamana, me da sa ivalavala vaka talega kina e na bula vou” (Roma 6:4).

“O koya eda sa bulu vata kaya kina, ni da sa papitaisotaki ki na nona mate.”

Era sa curu ki na matanitu vou na lewena, ni ra sa sucu vou, ka soli vei ira e dua na bula vou.

NA LAWA NI LOLOMA

Na matanitu kece e tu na kena lawa ka vauca na nodra bula na lewena. Na lawa ni Veiyalayalati Makawa, ka lawa vakaMosese, e a solia na Kalou mai na ulunivanua ko Sainai. Ia na lawa ni Veiyalayalati Vou e duidui sara. E sega ni volai e na vatu, ia e volai ga “e na dela ni yalomudou” (2 Korinica 3:3).

E a cauraka ko Jisu na matailalai ni lawa oqo e na Nona vunau mai na ulunivanua, ka volaitukutukutaki tu e na Maciu 5-7. E a kaya ko Jisu ni, na usutu ni lawa ni Veiyalayalati Makawa, e kunei e na dua na bula ka guta me talairawarawa ka vakamarautaka na tamada vakalomalagi.

“Dou  kakua ni vakasama ni’u sa lako mai me’u vakaotia na vunau, se na nodra ivakavuvuli na parofita; au sa sega ni lako mai me’u vakaotia, me’u vakayacora ga. Ni’u sa kaya vakaidina vei kemudou, E na takali mada ko lomalagi kei vuravura, ia e na sega ni takali mai na vunau e dua na mata-ni-vola lailai se dua na tikina lailai sara, e na yaco mada kecega. O koya oqo e na vakatokai kina me lailai sara e na matanitu vakalomalagi, ko koya yadua e na talaidredre ki na dua na vunau oqo sa lailai sara, ka vakatavuvuli vakakina vei ira na tamata; ia ko  koya e na vakabauta ka vakatavuvulitaka, e na vakatokai me levu e na matanitu vakalomalagi” (Maciu 5:17-19).

Na dra i Jisu, e a sauma e dua na “sala vou ka bula” (Iperiu 10:20), na sala ni talairawarawa ki na lawa ni loloma. O ya na isausau ni bula ka ra bulataka na lewe ni matanitu ni Kalou.

NA ITOVO NI BULA KA KILAI TANI

Ko ira na  lewe ni matanitu ka ra sa voli e na dra, era bulataka na itovo ni bula era kilai tani kina mai vei ira era bula wavoliti ira, ka raica ko vuravura ni ra dua tani sara. E sa veisau na nodra bulataka na nodra bula, mai na gauna ni bera nodra curu mai ki na matanitu. Na Kolosa 3:9-10 e kaya:

“Kakua ni dauveilasuyaki, ni dou sa luvata tu na tamata makawa kei na nona ivalavala; ka dou sa vakasuluma oqori sa vou, o koya sa vakavoui tiko e na vuku me vaka na yaloyalona ka buli koya.”

Ko ira na lewe ni matanitu oqo, era yavutaka na nodra digidigi yadua, e na yalo e guta me vakamarautaka na Kalou.

E na rawa beka vakaevei me da cakava oqo me itovo ni noda bula ni veisiga? E kaya na Filipai 2:5, “Me tiko e na lomamudou na yalo oqo ka tiko talega vei Karisito Jisu.” Na sala duadua ga eda rawa ni muria kina na lawa ni loloma, sa ikoya me da nanuma me vaka na nanuma i Jisu. E sa rawa oqo ni da sa vakasinaiti mai na Yalo Tabu vata ga ka vakasinaiti Koya. “Ni sa iKoya na Kalou sa cakacaka e na lomamudou me vaka na Nona lewa vinaka, mo dou nakita ka kitaka talega” (Filipai 2:13).

NA VEIKA SA YACO KEI NA VEIKA E SE BERA

E so na qasenivuli ni Vola Tabu, ni ra tukuni ira era a bula ni bera na gauna nei Jisu, era dau taurivaka e dua na ivakamacala matata, me ra vakaraitaka kina na nodra rai na tamata e na gauna makawa o ya, e na itovo ni Nona na tadu mai na Mesaia, kei na kena na tauyavu na matanitu vou. Era na droinitaka na qasenivuli e rua na polo mokimokiti. Na polo e na imawi, e ivakatakilakila ni vuravura oqo. Na polo e na imatau, e ivakatakilakila ni vuravura ka se bera mai. Na kedrau tadrua na polo e rua oqo, e ivakatakilakila ni dua na ka veiyavalati: na Nona na tadu mai na Mesaia.

Na kedrau tadrua na polo e rua oqo, e ivakatakilakila ni dua na ka veiyavalati: na Nona na tadu mai na Mesaia.

E na nodra rai na tamata e na gauna makawa, na nona na tadu mai na Mesaia, e na vakavuna e dua na veisau levu me yaco, ka na tauyavu e dua na itovo ni bula vou. E sa na takali yani na vuravura makawa (“na vuravura oqo”), ka sa na sosomitaka e dua na vuravura vou (“na vuravura se bera mai”).

O keda eda sa bula e na daku ni Veiyalayalati Vou, eda kila ni dodonu me veisautaki na droini ni polo e rua o ya, me veiriti kina kei na iVola Tabu. E rau se ivakatakilakila tikoga ni vuravura oqo kei na vuravura ka se bera mai, ia e dodonu beka me rau veitaqai vakatikina na polo e rua o ya, ka sega me rau dui tutu. E dodonu me rau kovuta vata e dua na vanua me ivakatakilakila ni kena sa bula tiko na matanitu ni Kalou e na gauna oqo. Era se lewe tiko ga ni vuravura oqo na lewe ni matanitu ni Kalou, ia era sa curu oti talega ki na vuravura ka se bera mai.

E dodonu me rau kovuta vata e dua na vanua me ivakatakilakila ni kena sa bula tiko na matanitu ni Kalou e na gauna oqo.

Oqo na ivakarau ni matanitu ka sa voli oti e na dra. E na dua na yasana, na matanitu e sa vakavotukana oti tu e na gauna oqo. Ia, e na dua tale na yasana, na matanitu oqo e matanitu ni gauna ka se bera mai, ka se bera ni vakacavari sara na kena tauyavu.

E na mate nei Jisu e na kauveilatai, me sauma kina na isau ni valavala ca e na Nona dra, e a sa vakadrukai kina na meca. E a tauyavu na matanitu mai Kalivari. E matanitu qaqa na matanitu oqo, ka ni a kaya ko Jisu, “Au a raici Setani ni sa lutu sobu mai lomalagi me vaka na livaliva” (Luke 10:18). E sa vakadasilataki oti na kaukauwa nei Setani, ka sa tau oti na lewa me baleta na nona icavacava.

Dina ga ni da sa kila na dina oqo, ia ko Setani e se sega ni via kaya ni sa druka. Dina ga ni sa vakadrelitaki na nona iseleiwau, na ivalu ni vinaka kei na ca, e na ia tikoga me yacova na gauna e sa na qai vakacavari kina na tauyavu ni matanitu.

E na icavacava ni gauna kei na ivakatekivu ni bula tawamudu, na sere levu ni lagilagi kei na qaqa ka na laga, sa ikoya na sere ni dra kei na vakamuduo ki vua na Lami ka a vakamatei, (Vakatakila 5:12-14). Au vakabauta ni sere oqo, e na qai kacivaka mai na kena vakacavari na tauyavu ni matanitu ni Kalou, ka voli e na dra. Ia, me yacova na gauna o ya, eda sa rawa me vulica me da bulataka na bula vakatui kei na bula vakabete e na Nona serau na Tamada vakalomalagi, e na noda bula tiko e na ruku ni lawa ni loloma, ka da vakayacora tu na Nona lewa e na yalo sa vakarorogo ka talairawarawa.

Back To Table of Contents

 

Posted in Uncategorized | Leave a comment

Wase 13 – NA KAUKAUWA NI DRA EDAIDAI

“O koya ga mo dou vakaraici kemudou, kei ira kecega na qele-ni-sipi, ni sa lesi kemudou kina na Yalo Tabu mo dou nodra ivakatawa, mo dou vakania na isoqosoqo lewe ni lotu ni Kalou; ko ira sa volia ko Koya, e na Nona dra ga” (Cakacaka 20:28).

 

Na dra nei Jisu e taukena na kaukauwa me veisautaka na ivolatukutuku kei vuravura, ka ko keda, eda sa tiki ni ivolatukutuku o ya. Ko Kalivari e sa itakele ni veitabagauna kece sara: na veitabagauna kece ni se bera na kauveilatai era vakanamata mai kina; ka vakakina na veitabagauna e daku ni kauveilatai, era rai lesu kina. E laurai tu na kauveilatai  nei Karisito kei na kena bibi tawamudu, ni duri rewaicake duadua tu e maliwa ni veika kece tale e na ivolatukutuku kei vuravura. Na itukutuku bibi ni kauveilatai sa ikoya oqo: Na tamata e sa yali tawamudu tu kevaka e sega na nona iVakabula. E a lako mai ki vuravura na Karisito, ka mai mate me cola kina na itotogi e vuku ni tamata, ka me solia vua na bula tawamudu.

Na tamata e sa yali tawamudu tu kevaka e sega na nona iVakabula.

Na ivakatakilakila ni dra ni veivakaduavatataki, e vosa cake vakadomoilevu ka vakamatata. Na rorogo ni kena kaci e voqa e na veitabatamata taucoko, ka dodo yawa mai e na dela ni veitabayabaki. O ya na kaci ka kacivaki mai ki na dui yaloda kei na noda dui bula yadua.

Taumada, eda na dui ciqoma vakaevei na veisureti ki na bula tawamudu e na Nona solia na Nona bula na Lami? A ikarua, eda na bulataka vakaevei na noda dui bula, me da vakavinavinakataka rawa kina na iloloma talei oqo, kei Koya na Luve ni Kalou yalololoma ka solia vei keda?

E SE SEGA NI BAU MALUMALUMU MAI NA KAUKAUWA NI DRA

E na iwase ni ivola eda se qai wilika oti, eda a tukuna kina me baleta na veika sa yaco oti, kei na veika e se bera mai. O keda ka da sa wili ki na matanitu ni Kalou, eda sa tu oqo e na vanua ka rau veitaqai kina na polo e rua o ya. Eda sa tu e na matanitu, ia eda se tu talega e na vuravura bale oqo. Ko keda na kawatamata ni veiyalayalati vou ni Kalou, eda sa kacivi me da kauta na itukutuku ni veivakabulai kei na veisereki e na vuku ni dra, ki vei ira eda bula mailwai ira e na vuravura bale oqo.

Me yacova mai edaidai,  e se sega ni bau malumalumu mai na kaukauwa ni dra. E sega ni vakaiyalayala na veika e sa vakayacora na dra i Jisu, ka vakakina na veika e na vakayacora, e na noda bulataka na bula veitokani ni veiyalayalati kei na noda Kalou, ni da sa Nona – o ikeda na isoqosoqo lewe ni lotu.

NA KAWATAMATA NI VEIYALAYALATI NI KALOU E VURAVURA

Sa ibulibuli talei ni Kalou na isoqosoqo lewe ni lotu. Ko ira era sa voli oti e na dra, era taukeni mai Vua, ka ra cakacaka tiko e Vukuna e vuravura, e sa soli ka vakatautaki tu vei ira e dua na ilesilesi bibi.

Sa ibulibuli talei ni Kalou na isoqosoqo lewe ni lotu.

NA VEITAVAKI KEI NA SERAU NI KALOU

E na sega ni vakayacora rawa vaka ikoya na cakacaka ni Yalo na isoqosoqo lewe ni lotu, e na kaukauwa vakatamata ga. Sa na rawa duadua ga oqori kevaka e vakasaqara ka ciqoma na serau ni Kalou.  Ni vakamacala tiko e na tikina oqo, e kaya na ivola ki vei ira na kai Efeso 2:20-22:

“Ka dou sa tara cake  e na nodra yavu na i apositolo kei ira na parofita, ia sa ikoya ko Jisu Karisito sa kena ivakadei e tutu-ni-vale. O koya sa sema vata kina na vale taucoko, a sa tubu cake kina me vale tabu ni sa tu vata kei na Turaga: o koya dou sa vakatataki vata talega kina me vale ni Kalou ni sa tiko kina na Yalo Tabu.”

Na veikacivi cecere duadua vei ira na sa kacivi, o ya me ra vakarokorokotaka na Kalou. E sa kilikili Vua me vakarokorokotaki ka vakacerecerei, me laveti cake na Yacana me ivakadinadina ni Nona kaukauwa kei na Nona vinaka. Ni ra dau soqoni vata mai na tamata ni Kalou e na gauna makawa me ra vakacabo isoro, ko ira na tamata vakabauta ni veiyalayalati vou, era sa kila tu ni sa cabo oti na iSoro e dua, ka ra soqoni vata mai me ra vakalevulevuya na yaca iKoya ka a vakadavea na Nona dra me ra vakabulai kina.

Na isoqosoqo lewe ni lotu, ni dabe donu tu, e sa yasana ka vakaitikotiko kina na Kalou e na kedra maliwa na Nona tamata.

NA KACIVAKI NI TUKUTUKU NEI KARISITO

Me vaka ni ra sa kawatamata ni Kalou, na isoqosoqo lewe ni lotu e vakamarautaka na Kalou, ka veiqaravi vakavinaka ki vuravura, e na gauna e vunautaka kina vakadodonu na itukutuku ka solia kina ko Karisito. Na itukutuku oqo e vuqa na kena ivakamacala, ka vakamatatataka na vosa kei na bula nei Karisito e na Nona a bula voli e vuravura.

E a cudruva na vu-ni-lolo ko Jisu baleta ni a sega ni vuataka na vuana ka a namaki me vuataka. (Maciu 21:19). Na isoqosoqo lewe ni lotu ka sega ni veivakalotutaki, e sa vaka e dua na vunikau ka sega ni vua, ka sa vakamaumautaka walega na qele e tubu kina; se vaka e dua na vale ka sa lala tu, ka volai tu e na kena katuba “Ikapoti” (“sa yali na i ukuuku” –1 Samuela 4:21). E a vakadavea na Nona dra talei ko Karisito me vakabulai kina na tamata kecega, ia kevaka e sega ni vakadewataka na isoqosoqo lewe ni lotu vei ira na tagane kei na yalewa, na cakacaka e sa cakava ko Koya, sa sega ni vuataka na vuana.

E a cudruva na vu-ni-lolo ko Jisu baleta ni a sega ni vuataka na vuana ka a namaka me vuataka. (Maciu 21:19).

E sa na bau vakararawataka dina na yalo ni Kalou me raica na isoqosoqo lewe ni lotu ni cakava tiko na veicakacaka kece tale e so, ka vakavo ga na ilesilesi ka a lesia kina me cakava. O keda eda sa tamata vakabulai ni Kalou, ka sa noda itavi me da bulataka ka da kacivaka na dina ni Nona vakacabo isoro cecere ko Jisu. E dodonu me da kacivaka na iSoro savasava duadua oqo, o Koya ka a solia me dave na Nona dra me savai kina na ivalavala ca ni tamata.

SOLIA VUA NA KALOU NA LAGILAGI

E dua na itavi bibi taumada ni kawatamata ni Kalou, o ya me solia Vua na lagilagi. Eda cakava oqo e na noda tukuna na veika e vakatakila vei keda na Kalou, na veika veivakurabuitaki kei na Nona kaukauwa, kei na noda vakacerecereya tikoga na Yacana. Na Efeso 3:20-21 e kaya vei keda me da vakalagilagi Koya e na vosa oqo:

“Ia vei Koya, sa rawata me cakava na ka sa uasivi cake vakalevu sara e na ka kecega eda sa kerea se vakasama kina, me vaka na kaukauwa sa cakacaka yaco e na lomada; me ia vei Koya na vakarokoroko e na isoqosoqo lewe ni lotu e na vuku i Karisito Jisu, me yacova na veitabatamata kecega ka sega ni mudu. Emeni.”

VAKADEWATAKI NI NONA VUKU TAWA YALANI NA KALOU

Na tamata e sa dau vakasaqara voli mai me kunea na sala me vakabulai koya kina vaka ikoya, ia na lewa ni Kalou me baleta na sasaga oqo ni tamata e tukuni vakamatata tu e na 1 Korinica 1:21:

“Io, ni sa vuku tu na Kalou, a ra sa sega ni kila na Kalou na kai vuravura e na nodra vuku, sa qai vinakata na Kalou me vakabulai ira era sa vakabauta, e na vosa vakalialia.”

Ko vuravura e dikeva na kosipeli, ka kaya ni ka lialia. Na vakasama, ni taukena na dra ni Lami na kaukauwa me veivakabulai, e ka rogorogo lialia vei ira e so. Ia, na isoqosoqo lewe ni lotu vaka ikoya, e nakiti me ivakavotukanataki ni vuku cecere ni Kalou, ka vakaraitaki e na kauveilatai. E kaya vakaoqo na Efeso 3:10: “Me yaco kina, e na gauna oqo, na isoqosoqo lewe ni lotu, me ivakatakilakila vei ira na turaga kei ira sa kaukauwa e na veiyasana vakalomalagi ni sa takiveivinaka sara na vuku ni Kalou.”

E a kila tu ko Paula ni na vakatakilai na vuku e na vunautaki ni kosipeli.

“Ni’u sa sega ni maduataka na itukutuku vinaka kei Karisito: ni sa ikoya oqo na kaukauwa ni Kalou me vakabulai kina ko ira yadua era sa vakabauta (Roma 1:16).

Na itukutuku vinaka ni kosipeli, sa ikoya, ni dra e yaga me voli lesu kina ko vuravura taucoko, ka rawa me vakayagataki me vakabulai kina e dua e rogoca na itukutuku, ka ciqoma e na yalo ni veivutuni kei na loloma. Na cakacaka loloma ni isoqosoqo lewe ni lotu, sa ikoya me kauta na itukutuku ni veivinakati oqo ki vuravura taucoko.

“Ni’u sa sega ni maduataka na itukutuku vinaka kei Karisito: ni sa ikoya oqo na kaukauwa ni Kalou me vakabulai kina ko ira yadua era sa vakabauta" (Roma 1:16).

“Ka me vakaveivinakatitaki ira kaya na ka kecega e na vukuna, ni sa ia mada na ka ni veivinakati e na Nona dra ni sa lauvako ki na kauveilatai; io e na vukuna ga, se ra tu e vuravura se ra tu mai lomalagi.” (Kolosa 1:20)

Eda sa kacivi ka da lesi me da kacivaka na itukutuku vinaka, ka vauqeti ira na tagane kei na yalewa me ra ciqoma.

Na cakacaka ni veivakalotutaki e vakayacori e na kena vunautaki na Vosa, e na veiwasei kei na tukuni yalo, e na nodra talai na kaulotu, kei na kena vakayagataki na veisala e vuqa ni vakau itukutuku. Me vakataki Paula, me da sa yaco me da ka kecega vei ira kecega na tamata, me da vakabula kina e so e na ka kecega (1 Korinica 9:22).

 

NA VEIVAKATATAKI CAKE

Na veivakatataki cake, e kena ibalebale me tara cake,  se me vakatubura cake. E na nona dodoliga yani ki vuravura, e sega ni dodonu vua na isoqosoqo lewe ni lotu me guilecavi ira na lewena. Me ra kua ni biligi vakatikitiki se guilecavi na veitiki ni Yago. E dodonu me ra ovici e na veitokani veilomani, ka me ra vakani vakavinaka mai na Vosa me ra tubu kina e na tubu e vaKarisito.

“Ia kevaka eda sa ia na ivalavala ni rarama, me vaka e sa tu e na rarama ko Koya, eda sa qai duiveiwekani vata, a sa vakasavasavataki keda mai na ca kecega na dra i Jisu Karisito na Luvena” (1 Joni 1:7).

E sa tubu cake tikoga na noqu kila, e na noqu uqeti tiko mai na kaukauwa ni dra me veivueti, veivakatabui, ka veitabaki, ni inuinui levu ni isoqosoqo lewe ni lotu me vakateteya na itukutuku kei na kaukauwa ni dra, o ya me tuberi ira, vakarautaki ira ka vakatavulici ira na tamata ni Kalou e na kena caka na cakacaka bibi oqo.

E na nona vakatuburi ira tiko na turaga kei na marama na isoqosoqo lewe ni lotu me ra kauta na itukutuku ni kosipeli, e na gauna vata tale ga o ya, era sa tubu tale tikoga na lewe ni lotu oqo me ra tamata sinai e na loloma ka me ra kaukauwa vakayalo. Oqo e sa ituvatuva ni Kalou me baleti ira na Nona tamata ka sa voli ira oti e na dra.

Ni sa dau tekivu vakadewataka yani na Vosa ni Kalou na isoqosoqo lewe ni lotu, e dau yaco e dua na ka vakurabui vei ira na lewena: Era dau tubu cake me ra ucui Karisito vakalevu cake:

“Ia sa ikoya sa solia e so, me ra i apositolo; ka so me ra parofita; ka so, me ra tamata dauvunau voli; ka so me ra ivakatawa ka ivakavuvuli: me ra vakavinakataki kina ko ira sa lotu, me ia na cakacaka ni talatala, me vakatataki cake na ivavakoso nei Karisito: me da yaco sara ko ikeda kecega me da lomavata e na vakabauta, ka kila sara na Luve ni Kalou, me da tautauvata kei na ivakarau ni tamata dina, era sa sinai sara kei Karisito” (Efeso 4:11-13).

NODRA VAKADODONUTAKI NA LEWENA

E dua na tikina e na Vakatakila, e tukuni kina e dua na isoqosoqo lotu ka sa rui vakararawataka na Kalou, ka ni a qai kaya “Ka’u na luaraki iko mai na gusuqu” (Vakatakila 3:16). E levu sara na veika e namaka na Kalou mai vei ira na luvena ka ra sa voli oti e na dra.  E dua vei ira oqori, sa ikoya na Nona namaka me ra vakadodonutaki ka ra vunauci ko ira era caka cala. E a vakamacalataka ko Jisu na kena icakacaka:

“Ia kevaka sa ivalavala ca vei iko na wekamu, lako ka vunauca ni drau sa tiko vaka ikemudrau ga: kevaka e na rogoci iko, ko sa qai rawai koya na wekamu. Ia kevaka e na sega ni rogoca, me qai lewe dua se lewe rua tale mo kauta vata kei iko, me vakadinadinataki na vosa kecega e na gusu ni dautukutuku e le rua se le tolu. Ia kevaka e bese ni rogoci iratou, tukuna vei ira na isoqosoqo lewe ni lotu; ia kevaka e bese ko koya ni rogoci ira na isoqosoqo lewe ni lotu, me qai vaka na tawa-lotu kei koya sa kumuna na ivakacavacava vei iko ko koya” (Maciu 18:15-17).

NA NODRA QARAVI  NA DRAVUDRAVUA

E a tukuna ko Jisu na veika e bibi e na Nona veiqaravi, ka vakayagataka na tikina mai na ivola nei Aisea, ka cavuti kina na itovo ni veiqaravi e gadrevi, o ya o koya e laurai votu ka veiriti. E a tauyavutaka ko Jisu na Nona veiqaravi raraba vei ira na tamata, e na Nona cavuti Aisea ka kaya:

“Sa tu vei au na Yalo i Jiova, ni sa lumuti au ko Koya me’u vunautaka na itukutuku vinaka vei ira era sa dravudravua; me’u vunautaka na sereki vei ira na bobula, kei na rai vei ira sa mataboko, me’u vakalalagataki ira era sa mavoa, me’u vunautaka na yabaki vinaka i Jiova”

E na veiqaravi nei Jisu, e a vakani ira na viakana, vakabulai ira na tauvi mate, vosa ni veivauqeti vei ira na lolosi, ka vakamarautaki ira na dravudravua.  Oqo talega na ilesilesi era sa kacivi kina ko ira na Nona tamata.

“Sa tu vei au na Yalo i Jiova, ni sa lumuti au ko Koya me’u vunautaka na itukutuku vinaka vei ira era sa dravudravua..."

E tarogi keda na iVola Tabu:

“Ia kevaka sa dua na veiwekani se yalewa se tagane sa sega na nona isulu, ka sega na kena e na veisiga, ia ka dua vei kemudou sa kaya vei ira, dou lako e na vakacegu, dou tatalai ka vakamamautaki; ia dou sa sega ni solia na veika e yaga ki na yagodra; a cava na betena? Sa vaka talega kina na vakabauta kevaka sa sega ni tu vata kei na cakacaka, sa mate ga ni sa tu duadua ga” (Jemesa 2:15-17).

E cavuti vakawasoma e na Veiyalayalati Vou ni ra namaki na tamata ni Kalou me ra kauwaitaka  na nodra gagadre na vakaloloma kei na dravudravua. Era sa tamata dau veikauwaitaki ko ira na tamata ni Kalou. Na noda veikauwaitaki e iyaloyalo i Koya na Yalo Tabu ka volai vakaoqo na kena itukutuku:

“E na vakatanievei na dra nei Karisito, o Koya ka vakacabori Koya vua na Kalou e na vuku ni Yalo Tabu tawa mudu ia ka sega vua na ca, e na sega beka ni rawarawa sara me vui laivi kina na nomudou lewa-eloma mai na cakacaka sa ka ni mate, mo dou qarava na Kalou bula?” (Iperiu 9:14).

BULATAKA NA BULA SA VAKATABUI

“O koya ga oqo sa mate kina ko Jisu e taudaku ni matamata-ni-koro, me vakasavasavataki ira na tamata e na Nona dra. E na vuku ni ka oqo me da lako kina ki vei Koya ki na ibili, ka vosota vata kaya na veivakalialiai. Ni sa sega na noda koro e ke me da tiko vakadua kina, ia eda sa vakasaqara ga e dua e na muri mai. Ia ko koya oqo me da qai vakacabora tikoga na imadrali ni vakavinavinaka vua na Kalou e na vukuna, oqori na vua ni tebenigusuda, ni da tusanaka na Yacana. Kakua talega ni guilecava na caka vinaka kei na dausoli ka: ni sa vinakata sara na Kalou na imadrali vakaoqo” (Iperiu 13:12-16).

E na vuku ni dra i Karisito, eda sa wasei tani ka voli mai vua na Kalou. Ka sa tugana na Nona lawa ki na noda vakanananu ka vola e lomada (Iperiu 8:10), ka sa dodonu me da bulataka na noda bula me vaka ni da sa Nona ka da sa ucui Koya.

E dua na sala bibi eda rawa ni dau vakananuma kina ni da sa Nona na Kalou, o ya e na noda veiwaseitaka na iVakayakavi ni Turaga, ka da nanuma lesu kina na vakadavei ni Nona dra e vukuda, kei na bula vou e sa noda e na vuku ni Nona isoro.

Eda nanuma na kaukauwa ni dra e na veigauna eda kana vata kina e na iVakayakavi ni  lesu mai ki na noda vakanananu na kaukauwa e taukena na dra, ni da kila vinaka na bibi ni sakaramede oqo.

E na kena ivakatekivu na sakaramede oqo, e a kaya ko Jisu vei ira na Nona tisaipeli:

“Ia ka’u sa kaya vei kemudou, Au na sega ni gunuva e muri na vua ni vaini oqo, ka malua me yaco mada na siga ka’u na gunuva vou kina kei kemudou e na matanitu nei Tamaqu.” (Maciu 26:29).

E sega ni dau kila vinaka na isoqosoqo lewe ni lotu na ibalebale dina ni vosa oqo. Eda dau nanuma wasoma ni gauna e tukuna tiko oqo ko Jisu, e se yawa sara, ka rairai na qai yaco beka e na matanitu vakalomalagi ka cavuti wasoma e na iVola Tabu.

Ia, na kena dina oqo: E a sa vakavotukana oti na matanitu vei iratou na tisaipeli, mai na ruku ni kauveilatai. E na gauna e ratou a qai veiwasei tale kina e na iVakayakavi ni Turaga, e ratou a sa “gunuva vou tiko na vua ni vaini e na matanitu nei Tamana.” Na itukutuku marautaki ni dina oqo, o ya, na yalayala ni sa tiko vata kei keda ko Koya.

Au via bolei iko mo kania na iVakayakavi oqo, sega me vaka ga e dua na itavi vakalotu ka da dau cakava ga baleta ni sa kena itovo tu mai vakadede, ia me da raica ni oqo e dua na gauna eda sa curu dina kina ki na iserau ni Kalou. Mo kila ni sa tu maliwai keda tu ko Jisu e na teveli. E kaya tiko vei keda e daidai me vaka na Nona a kaya vei ratou na Nona tisaipeli, “Au a gadreva vakalevu me’u ia mada e liu kei kemudou na kana vata ni lako-sivia oqo, me’u qai mate e muri” (Luke 22:15).

E na nomu sa kila oqo, e na qai vakavotukana sara vei iko na kaukauwa e taukena na dra. Ko sa na qai yalo dei mo vosa Vua e na nomu wasea kei Koya na Nona ivakayakavi. Ko na rawa ni rogoci Koya ni kaya vei iko, “E ka ni marau vei au me daru veitokani. E tu e dua na nomu gagadre? E tu e dua na ka au rawa ni vukei iko kina? Na cava e rawa ni’u cakava me’u vakalougatataki iko kina?”

"Na cava e rawa ni'u cakava me'u vakalougatataki iko kina?"

Ni ko torova yani na teveli ni iVakayakavi e na itovo ni veitokani voleka vakaoqo, e na nomu kila ni sa gadreva o Jisu mo drau mai veitokani e na gauna vinaka oqo, e sa na qai sega ni dua walega na ivakatakilakila ni dua na cakacaka vakalotu mai na gauna makawa na kana vata oqo, ia e sa na veisau me kena vakavotukanataki edaidai na veitokani kei na Kalou, kei na nomu sotava ka raica na Nona kaukauwa – na kaukauwa e taukena na dra.

Sa dodonu kina, ni ko lako ki na iVakayakavi ni Turaga, mo nanuma na veika sa cakava na Kalou me vuya kina na nomu ivalavala ca, vueti iko, vakabulai iko, ka solia vei iko na bula marau e na vuravura oqo. Na kalougata kece ko sotava e yaco rawa ga e na vuku ni dra ni Lami.

 

NA ITUVATUVA NI ISOQOSOQO LEWE NI LOTU

Sa vuabale na noqu reki kei na marau ni’u vakananuma na loloma tawa yalani ka lomana kina na isoqosoqo lewe ni lotu ko Jisu, kei na ituvatuva lagilagi e sa vakarautaka tu e vukuna. Mo nanuma, ni sa “iSoqosoqo lewe ni lotu ni Kalou; ko ira sa volia ko Koya e na Nona dra ga” (Cakacaka 20:28). Sa “lomana na isoqosoqoso lewe ni lotu na Karisito, a sa soli Koya e na vukuna” (Efeso 5:25).

Na parofita ko Malakai, e a vola vakaoqo na vosa ni Tamada vakalomalagi:

“A sa kaya ko Jiova ni lewe vuqa, era na noqu ga, e na siga ka’u na kumuna kina na noqu iyau talei; ia ka’u na lomani ira, me vaka na tamata sa lomani koya na luvena sa qaravi koya” (Malakai 3:17).

Sa tu na nodra inuinui na luve ni isoqosoqo lewe ni lotu me baleta na gauna oqo kei na gauna mai muri, ka sega e dua me a tukuna vakamatata cake me vakataki Taito:

“Ni sa rairai na loloma ni Kalou, o koya sa vu ni bula vei ira kecega na tamata; a sa vakavulici keda me da biuta na ivalavala sa sega ni vakalotu, kei na gagadre ca vakavuravura, me da ia na ivalavala yalomatua, ka yalododonu, ka vakalotu, e vuravura oqo; ni da waraka na ka ni veivakalougatataki eda sa nuitaka, kei na Nona rairai vakaiukuuku na Kalou levu na noda ivakabula ko Jisu Karisito” (Taito 2:11-13).

E sega walega ni da marautaka e dua na itovo ni bula cecere ka vakayalo e na vuravura oqo, ka marau kina na Kalou, ia e sa noda talega na inuinui lagilagi me baleta na gauna mai muri. E se sega ni matata sara vakavinaka vei keda na matailalai ni bula ka se bera mai, ka ni levu na veika lagilagi o ya e se vunitaki tu mai vei keda e na noda kila vakaiyalayala ga. Ia, e so na dina e sa matata vinaka vei keda, ka solia vei keda na marau ni da kila. E dua na kena ivakaraitaki, e tukuna ko Joni:

“Oi kemudou sa lomani, eda sa qai luve ni Kalou, ia sa sega ni rairai se da na vakaevei mai muri: oqo ga eda sa kila, ni na rairai mai ko Koya, eda na tautauvata kaya; ni da na raica na matana dina” (1 Joni 3:2).

Ko keda na luve ni isoqosoqo lewe ni lotu, e dodonu me da kila, ni tukuni talega e na Vakatakila kei na so tale na ivola e na iVola Tabu ka tukuni kina na siga ni qaqa o ya, na “noda na veirai e na matanavotu” kei Jisu (1 Korinica 13:12):

“Sa oti oqo ka’u sa vakaraica, ka raica, sa dua na isoqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa, era sa tu e na mata ni tikotiko-vakaturaga , kei na mata ni Lami, era vakaisulu e na isulu vulavula, ka taura na iviu e na ligadra; a ra sa kaci e na domo levu, ka kaya, A vu ni bula na noda Kalou, o Koya sa tiko e na itikotiko-vakaturaga, vua na Lami talega” (Vakatakila 7:9-10).

E na qai basika mai na Lami ni Kalou, me da raici Koya e matanavotu. Na Lami talei ka a vakadavei na Nona dra, na dra ka a vu ni noda vakabulai, e na qai reki e na lagilagi eda na solia Vua. Era na kumuni vata kece mai na Nona tamata, me ra mai vakalagilagi Koya. E na voqa ko lomalagi taucoko e na vakaaleluya kei na vakarokoroko.

E na qai basika mai na Lami ni Kalou, me da raici Koya e matanavotu.

Na Lami – o Koya ka a vakamatei mai na ivakatekivu kei vuravura, o Koya ka a vakalialiai mai vei ira na tamata yalo vakatani, o Koya ka a sega ni kauwaitaki na Nona vakacabo isoro ni dra mai vei ira e milioni vakamilioni na tamata – o Koya ka talei ka dodonu duadua, e na qai vakacerecerei mai vei ira na Nona kawatamata ni veiyalayalati, e na yalo e sinai e na vakavinavinaka kei na vakamuduo, ka ra na mamarau e na nodra tiko e na Nona iserau, ka vakanamata tu ki na bula tawamudu, me ra na sega ni qai tawasei tale vakadua mai Vua.

BACK TO TABLE OF CONTENTS

——————————————————————–

Ni qai sikova talega na websites oqo:

Na iNaki Vuni E 5 Ni Nomu Bula

Eda A Buli Me Da Lewa

Gallery of Calvary


 

 

 

Posted in Uncategorized | Leave a comment